ამერიკის შეერთებული შტატები საქართველოს თავდაცვის გასაძლიერებლად 35 მილიონ დოლარს გამოუყოფს. აშშ-ს სახელმწიფო დეპარტამენტის წარმომადგენელმა წერილობითი კომენტარი ამერიკის ხმასთან გააკეთა. დახმარებაში შედის ბრიგადის საბრძოლო აღჭურვილობის კომპლექტი, უპილოტო საფრენი აპარატების საწინააღმდეგო სისტემა და სხვა.

"საქართველო მიიღებს $35 მილიონს, რაშიც შედის ბრიგადის საბრძოლო აღჭურვილობის კომპლექტი, უპილოტო საფრენი აპარატების საწინააღმდეგო სისტემა, მოწინავე საველე არტილერიის ტაქტიკური მონაცემების სისტემა, მობილურობის შესაძლებლობები და კიბერ-თავდაცვა", — ნათქვამია ამერიკის ხმისთვის გაგზავნილ სახელმწიფო დეპარტამენტის პასუხში.

სახელმწიფო დეპარტამენტის წარმომადგენელმა განაცხადა ისიც, რომ 713 მილიონი დოლარის ოდენობის უცხოური სამხედრო დაფინანსების (FMF) ფარგლებში 322 მილიონი დოლარი უკრაინის თავდაცვის შესაძლებლობების გაძლიერებას მოხმარდება. დანარჩენი თანხა კი ბალკანეთისა და ცენტრალური და აღმოსავლეთ ევროპის ქვეყნებზე განაწილდება.

დიპლომატიური უწყების წარმომადგენელი ასევე აცხადებს, რომ სახელმწიფო დეპარტამენტმა კონგრესს ამ თანხის გამოყოფის შესახებ ცნობა 24 აპრილს გაუგზავნა.