15 მარტს ჩეჩნეთის დედაქალაქ გროზნოში რუსეთის ფედერაციის უშიშროების საბჭოს მდივანმა, ნიკოლაი პატრუშევმა ჩრდილოეთ კავკასიაში ეროვნული უსაფრთხოების უზრუნველყოფის შესახებ შეხვედრა გამართა. შეხვედრაზე ჩეჩნეთის მთავრობის თავმჯდომარემ, მუსლიმ ხუჩიევმა ჩეჩნეთ-საქართველოს დამაკავშირებელი გზის პროექტზე ისაუბრა და განაცხადა, რომ სანქციებისა და გეოპოლიტიკური ვითარების ფონზე, ამ გზას რუსეთის ფედერაციისთვის სტრატეგიული მნიშვნელობა აქვს. მანვე აღნიშნა, რომ პროექტი 90-იან წლებში გაჩერდა, ახლა კი აღდგენა სურთ. სამთავრობო გუნდში განაცხადეს, რომ საქართველო არასდროს განიხილავდა და განიხილავს ჩეჩნეთთან გზის მშენებლობას.

რას ამბობს ჩეჩნეთი

ჩეჩნეთის რესპუბლიკის მთავრობის თავმჯდომარემ განაცხადა, რომ შექმნილი გეოპოლიტიკური მდგომარეობა მეზობელ სახელმწიფოებთან კონტაქტების დამყარების შესაძლებლობების აუცილებლობაზე მიანიშნებს. მისი თქმით, რამდენიმე წელია ჩეჩნეთი საქართველოსთან სასაზღვრო გადასასვლელის მოსაწყობად მუშაობენ.

"შექმნილი გეოპოლიტიკური სიტუაცია მიგვანიშნებს ხელისუფლების შტოების ერთობლივი მუშაობისა და მეზობელ სახელმწიფოებთან კონტაქტების დამყარების ახალი შესაძლებლობების აუცილებლობაზე, რომლის მიზანი ტვირთბრუნვის გაზრდაა. ჩეჩნეთის რესპუბლიკა უკვე რამდენიმე წელია აწარმოებს აქტიურ სამუშაოებს საქართველოს რესპუბლიკასთან სასაზღვრო გადასასვლელის მოსაწყობად.

ამ საკითხზე დიდ პრესკონფერენციაზე, 2019 წელს პუტინსაც მიმართეს, რაზეც ვლადიმერ ვლადიმეროვიჩმა განაცხადა, რომ ეს კარგი იდეაა, მაგრამ ჯერჯერობით ტრანსპორტის სამინისტროს პრაქტიკულ გეგმებში არ არის, თუმცა მისი განხორციელების მიზანშეწონილობა ნამდვილად არსებობს. გზის მშენებლობა ჯერ კიდევ 90–იან წლებში დაიწყო, თუმცა შეწყდა საბრძოლო მოქმედებების დაწყების გამო", — განაცხადა ხუჩიევმა.

ჩეჩნეთის წარმომადგენელი აცხადებს, რომ ამ პროექტს რუსეთისთვის სტრატეგიული მნიშნველობა აქვს. მისი განამრტებთი, ეს გზა უზრუნველყოფს დამოუკიდებელ გასასვლელს უცხოეთის ქვეყნებში. მაშინ, როცა რუსეთის წინააღმდეგ საერთაშორისო სანქციების რაოდენობა დღითიდღე იზრდება ჩეჩნეთის მთავრობის თავმჯდომარე რუსეთის უსაფრთხოების საბჭოს სთავაზობს, ჩეჩნეთსა და საქართველოს შორის გზის მშენელობის საკითხი განიხილოს.

"ჩეჩნეთიდან საქართველოსკენ გზას აქვს ძალიან დიდი სტრატეგიული მნიშვნელობა რუსეთის ფედერაციისთვის. ეს გზა უზრუნველყოფს დამოუკიდებელ გასასვლელს უცხოეთის ქვეყნებში: საქართველოში, სომხეთში, აზერბაიჯანში, თურქეთში, ირანში, რომლებსაც განვითარებული სატრანსპორტო კავშირი აქვთ, ზღვით, რკინიგზით.

ჩვენი ქვეყნის ირგვლივ განვითარებული რთული სიტუაციის გათვალისწინებით, ეს საკითხი უფრო მეტ აქტუალობას იძენს. გვინდა, რომ უსაფრთხოების საბჭოს სხდომაზე განიხილოთ ეს საკითხი", — თქვა მუსლიმ ხუჩიევმა.

ჩეჩნეთის მთავრობის წარმომადგენლის შეთავაზებაზე რუსეთის უშიშროების საბჭოს მდივანმა განაცხადა, რომ ამ საკითხს გადაწყვეტილების პროექტში ჩართავენ და შესაბამის ფორმულირებას ჩეჩნეთთან შეათანხმებენ.

"დიდი მადლობა. მოდით ჩავრთოთ გადაწყვეტილების პროექტში ეს საკითხი, შესაბამისი ფორმულირება მივცეთ, თქვენთან შევათანხმებთ ფორმულირებას", — თქვა პატრუშევმა.

რას ამბობს საქართველო

საქართველოს რეგიონალური განვითარებისა და ინფრასტრუქტურის სამინისტრო ჩეჩნეთთან გზის მშენებლობის საკითხს მას შემდეგ გამოეხმაურა, რაც ინფორმაცია ქართულ მედიასაშუალებებში გავრცელდა. სამინისტრო აცხადებს, რომ საქართველო არასდროს განიხილავდა და არც განიხილავს ჩეჩნეთთან დამაკავშირებელი რაიმე გზის მშენებლობას.

"გვსურს გამოვეხმაუროთ მედიაში გავრცელებულ ინფორმაციას რუსეთის უშიშროების საბჭოზე განხილულ საქართველო-ჩეჩნეთის დამაკავშირებელი გზის მშენებლობის საკითხზე და ერთმნიშვნელოვნად განვაცხადოთ, რომ საქართველო არასდროს განიხილავდა და არც განიხილავს საქართველოს ჩეჩნეთთან დამაკავშირებელი რაიმე გზის მშენებლობას. გზის მშენებლობის საკითხი არასდროს მდგარა ქართული მხარის დღის წესრიგში და შესაბამისად, ნებისმიერი ინფორმაცია მასთან დაკავშირებით არის მცდარი", — ვკითხულობთ განცხადებაში.

გზის მშენებლობაზე კომენტარი გააკეთა საქართველოში ამერიკის შეერთებული შტატების ელჩმა, კელი დეგნანმაც. მისი თქმით, სანამ რუსეთი რაიმე გზებზე, პროექტებსა თუ დაპირებებზე დაიწყებს საუბარს, მანამდე 2008 წლის შეთანხმებით ნაკისრი ვალდებულებები უნდა შეასრულოს და საქართველოს ტერიტორიიდან სამხედრო ძალები გაიყვანოს.

"რაც შეეხება გზას, როგორც მითხრეს საბჭოთა პერიოდის, 1970-იანი წლების პროექტზეა საუბარი, თუმცა რაც არ უნდა იყოს, სანამ რუსეთი რაიმე გზებზე, პროექტებსა თუ დაპირებებზე დაიწყებს საუბარს, მანამდე მათ უნდა შეასრულონ 2008 წლის შეთანხმებით ნაკისრი ვალდებულებები და გაიყვანოს ძალები საქართველოს ტერიტორიიდან. თუ გსურთ გაიგოთ რუსეთის გულწრფელობა ნებისმიერი მისი დაპირებისა თუ განცხადების მიმართ, საკმარისია შეხედოთ თუ რას აკეთებენ იმისათვის, რომ 2008 წლის შეთანხმებით ნაკისრი ვალდებულებები შეასრულონ — მათ არცერთი ეს ვალდებულება არ შეუსრულებიათ", — თქვა დეგნანმა.