ე.წ ციანიდის საქმეზე დაპატიმრებული დეკანოზი გიორგი მამალაძე გლდანის ციხიდან კლინიკა ვივამედში გადაიყვანეს. ამის შესახებ On.ge-ს მისმა ძმამ, თორნიკე მამალაძემ განუცხადა.

რა გახდა მამალაძის სამოქალაქო კლინიკაში გადაყვანის მიზეზი უცნობია, ვივამედში ამ კითხვას არ პასუხობენ. ისინი ამბობენ, რომ ხელშეკრულება აქვთ პენიტენციურ სისტემასთან და პაციენტები მათთან გადაჰყავთ, თუმცა პირადი ინფორმაციის გასაჯაროების უფლება არ აქვთ. აღნიშნულთან დაკავშირებით On.ge პენიტენციური სამსახურისაც დაუკავშირდა და მათგან პასუხს ელოდება.

თავად თორნიკე მამალაძე კი აცხადებს, რომ #18 დაწესებულება სასაკლაოა და 3 წლის განმავლობაში დეკანოზს არანაირი მკურნალობა არ ჩატარებია, რადგან საავადმყოფოს რესურსი არ გააჩნია.

"მითხრეს, რომ გადმოყვანილია ვივამედში, მაგრამ ჯერჯერობით გადმოყვანის მიზეზი ჩვენთვის უცნობია, მაგრამ თუ ეს არის რაღაც თემების გადაფარვის მცდელობა, ვეტყვი მათ, რომ ჩემი ძმა ამ ბინძურ საქმეში არ აყვება", — განუცხადა მან მთავარ არხს.

დეკანოზი მამალაძე სწორედ იმ დაწესებულებაში იყო, სადაც ექსპრეზიდენტი მიხეილ სააკაშვილი გადაიყვანეს. ექსპრეზიდენტი და მისი ადვოკატები უკვე დიდი ხანია სამოქალაქო კლინიკაში გადაყვანას ითხოვენ, თუმცა ხელისუფლება უარზეა.

სტრასბურგის სასამართლოს გადაწყვეტილების შემდეგ მან განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.