დაავადებათა კონტროლისა და საზოგადოებრივი ჯანდაცვის ეროვნული ცენტრის დირექტორის, ამირან გამყრელიძის განცხადებით, პიკი გადავლილია და ყველა პარამეტრით ეპიდსიტუაციის სტაბილიზაცია შეინიშნება. ის ამას შეზღუდვების შემოღებასა და მისი აღსრულების კონტროლის, ასევე "ინტენსიურ" აცრებს უკავშირებს.

"პირველად დღეს, ბოლო ერთი კვირის განმავლობაში, დადებითობის მაჩვენებელი მთელი ქვეყნის მასშტაბით, ბოლო 7 დღის საშუალო ჩამოსცდა 10%-ს, ასევე, პირველად ამ კვირაში, ბოლო 60 დღის განმავლობაში ინციდენტობის მაჩვენებელი საერთოდ და ასევე ე.წ. კუმულაციური ინციდენტობის მაჩვენებელმა, ჩვენ როგორც ვხმარობთ ხოლმე სიტყვას, კუდი ჩამოსწია ქვემოთკენ, ანუ ფერდი გადაიარა, პიკი და ქვემოთკენ მოდის, ანუ შეიმჩნევა ძალიან მცირე ვიტყოდი, მაგრამ სტაბილიზაციის ნიშნები ყველა პარამეტრით: ინციდენტობა, დადებითობის მაჩვენებელი, 1-ს ჩამოსცილდა ბოლო ერთი თვის განმავლობაში R ანუ რეპროდუქციის ინდექსი და 0,86 გვაქვს ახლა, სამწუხაროდ, ჯერჯერობით ყველაზე მძიმე ინდიკატორი რჩება მაღალი და იცით, რომ ეს ყოველთვის ორი კვირის შემდეგ პიკის გადავლიდან იწყებს თანდათან მერე შემცირებას, რასაც ჰქვია სიკვდილიანობა", — განაცხადა გამყრელიძემ საკოორდინაციო საბჭოს სხდომის დასრულების შემდეგ.

საკოორდინაციო საბჭოს გადაწყვეტილებით:

  • საქართველოში საზოგადოებრივი ტრანსპორტი 4 სექტემბერს არ აღდგება და შეზღუდვა 13 სექტემბრამდე გახანგრძლივდება;
  • სასწავლო პროცესი სკოლებში 15 სექტემბრიდან 4 ოქტომბრამდე დისტანციურ რეჟიმში განახლდება. ანალოგიური რეგულაცია გავრცელდება უმაღლეს და პროფესიულ სასწავლებლებზე;
  • 4 ოქტომბრამდე შეზღუდული დარჩება სააღმზრდელო დაწესებულებების მუშობა და ეს ეხება, როგორც სახელმწიფო, ასევე, კერძო ბაღებს.

მიუხედავად იმისა, რომ გამყრელიძის თქმით, ეპიდისტუაციის სტაბილიზაცია შეინიშნება, ქვეყანა კოვიდ მაჩვენებლების ანტირეკორდების დამყარებას აგრძელებს. 31 აგვისტოს მონაცემებით, ბოლო 24 საათის განმავლობაში 4778 ახალი შემთხვევა დადასტურდა და 79 ადამიანი გარდაიცვალა.