ჯანდაცვის მინისტრის, ეკატერინე ტიკარაძის განცხადებით, "ვერ იტყოდა", რომ ამ შეზღუდვების პირობებში მთავრობა ლოიალურია. მისი თქმით, ზედამხედველობითი თუ საჯარიმო ღონისძიება მუდმივად ხორციელდება და დარწმუნებულია, რომ ეს "თავის შედეგს გამოიღებს".

"ვერ ვიტყოდი, რომ მთავრობა არის ლოიალური ამ შეზღუდვების პირობებში, ვინაიდან, მხოლოდ შრომის ინსპექციის მხრიდან განხორცილდა არაერთი ზედმახედველობითი ღონისძიება და არაერთი საჯარიმო ღონისძიება. ამაში ჩართულები არიან, როგორც სურსათის უვნებლობა, ასევე, საპატრულო პოლიცია და ისინი ერთობლივად ახორციელბენ სხვადასხვა მონიტორინგსა და ასევე, საჯარიმო აქციებს.

მე დარწმუნებული ვარ, რომ ეს თავის შედეგს გამოიღებს. თუმცა მნიშვნელოვანია, არა მხოლოდ მოლოდინი მთავრობისგან, თუ რამდენად მკაცრი იქნება და ასევე, რამხელა სასჯელი იქნება ამაზე დაწესებული, ჩვენი თითოეული მოქალაქისა და ბიზნესის მაღალ სოციალურ პასუხიმგებლობას დღეს ყველაზე მნიშვნელოვანი როლი ენიჭება", — აცხადებს ის.

საკოორდინაციო საბჭოს 9 აგვისტოს გადაწყვეტილებით, სოციალური ღონისძიებების მასპინძლობისთვის კვების ობიექტი თუ სარიტუალო დარბაზის მფლობელი პირველ ჯერზე 10 000 ლარით დაჯარიმდება, ხოლო განმეორების შემთხვევაში შესაბამისი ობიექტი დაილუქება. ამასთან, 17 აგვისტოდან როგორც ღია, ასევე, დახურულ სივრცეებში პირბადის ტარება ისევ სავალდებულო გახდა.