ჰომოფობიურ და ძალადობრივ არხს, ალტ-ინფოს Jobs.ge-მ თანამშრომლობაზე უარი უთხრა და პლატფორმაზე მათი ვაკანსია არ გამოაქვეყნა. ამის შესახებ ფეისბუქზე Jobs.ge-ს დამფუძნებელი ლექსო ხუბულავა წერს, რომელიც საპასუხოდ გაგზავნილი ელექტრონული ფოსტის სქრინსაც აქვეყნებს.

"არ ვემსახურებით ორგანიზაციებს, რომლებიც ეწევიან ძალადობის პროპაგანდას უმცირესობების წინააღმდეგ და არღვევენ ცივილიზებული სამყაროს მიერ აღიარებულ ადამიანთა ფუნდამენტურ უფლებებს", — ვკითხულობთ ალტ-ინფოსთვის გაგზავნილ წერილში.

ფოტო: ლექსო ხუბულავა / Facebook

11 ივლისს Alt Info-ს ვებგვერდიც გათიშეს. ფეისბუქმომხმარებელი როი შენგელია ამბობდა, რომ მიმართა ჰოსტინგ კომპანია iPage.Com-ს და აცნობა, რომ აღნიშნული ვებგვერდი ავრცელებს სიძულვილის ენას, მოუწოდებს ხალხს აგრესიისკენ და არღვევს ანტი დისკრიმინაციულ კანონს, რის შემდეგაც გვერდი გაითიშა.

ალტ-ინფოს წამყვანები ძალადობრივი კონტრაქციის ორგანიზატორებს შორის არიან. სხვადასხვა განცხადებით ისინი საზოგადოებაში სიძულვილს თესავენ და აგრესიას აღვივებენ. ძალადობრივი კონტრაქციის შემდეგ მათი ტელეგრამის არხში აქტივისტების მიმართ ფიზიკური ანგარიშსწორებისა და სიცოცხლის მოსპობის მუქარები ვრცელდებოდა.

შეგახსენებთ, რომ ფეისბუქმა არაერთხელ დაბლოკა ალტ-ინფოს გვერდები და მათთან დაკავშირებული ქსელიც წაშალა. ისინი რამდენჯერმე ხელახლა დარეგისტრირდნენ და სხვა პლატფორმების გამოყენება დაიწყეს. აღსანიშნავია ისიც, რომ კომუნიკაციების კომისიამ მათ მაუწყებლობის უფლება მისცა.