ნამახვანჰესის მშენებლობის მოწინააღმდეგეებმა დღეს, 24 აპრილს საქართველოს მასშტაბით 13 ქალაქში საპროტესტო აქციები დაგეგმეს. აქტივისტ ვარლამ გოლეთიანის განცხადებით, მათი მხარდამჭერები სხვადასხვა ლოკაციაზე 16:00 საათზე შეიკრიბებიან.

მისივე ცნობით, აქციები გაიმართება შემდეგ ქალაქებში:

1. გუმათი — ჰესთან;
2. ბათუმი — ერას მოედანზე;
3. ქობულეთი — ცენტრალური პარკის ტერიტორიაზე;
4. ბოლნისი — ცენტრალურ შესასვლელთან;
5. რუსთავი — გმირთა მემორიალის სკვერთან;
6. ზუგდიდი — მთავარი მოედანზე;
7. ფოთი — რუსთაველის რკალი, კოლხი დედის ძეგლთან;
8. წყალტუბო — გასასვლელში მოედანთან;
9. ლენტეხი — რაიონში შესასვლელთან;
10. ყაზბეგი — სტეფანწმინდის მოედანთან;
11. ლანჩხუთი — ჟორდანიას ქუჩაზე;
12. თერჯოლა — ცენტრში, საკათედრო ტაძართან;
13. რუისი — აგრო ბაზრის მიმდებარედ.

ნამახვანჰესის მშენებლობის მოწინააღმდეგეები აცხადებენ, რომ ხელისუფლების პასუხი მათი მოთხოვნების დაუკმაყოფილებლობაა, რასაც აქციებით უპასუხებენ. 23 მაისს მათ აქცია დააანონსეს თბილისშიც.

აქტივისტების მოთხოვნები და ხელისუფლების პასუხი

რიონის ხეობის აქტივისტები ხელისუფლების მხრიდან პირობებზე პასუხს ერთი კვირის განმავლობაში ელოდნენ. ამბობდნენ, რომ სამივე მოთხოვნის შეუსრულებლობის შემთხვევაში სხვადასხვა ქალაქში მასშტაბურ აქციებს გამართავდნენ. ისინი ითხოვდნენ, მოიხსნას ბარიკადები, რომ მიეცეთ ნამოხვანისკენ გადაადგილებისა და იმავე სივრცეში პროტესტის გაგრძელების საშუალება, ასევე, კომპანია ENKA-მ ჰესის მოსამზადებელი სამუშაოები შეაჩეროს.

დღეს, 24 აპრილს მთავრობამ ნამახვანჰესის მშენებლობასთან დაკავშირებით რამდენიმე გადაწყვეტილება მიიღო. კერძოდ:

• ენკასთან დადებული ხელშეკრულების შესწავლა დაევალა იუსტიციის სამინისტროს;
• მედიაციის პროცესში ჩაერთვება ევროკავშირის ენერგეტიკული გაერთიანების სრულუფლებიანი წარმომადგენელი;
• მშენებლობაზე გამოცხადდა მორატორიუმი 9-12 თვის ვადით, თუმცა კომპანია პირველი ეტაპის მოსამზადებელ სამუშაოებს გააგრძელებს;
• ნამახვანჰესის მიმდებარე ტერიტორიაზე პოლიცია მოხსნის ბარიერებს;
  აქტივისტებს კარვის გასაშლელად ადგილს შეარჩევინებენ.

რამდენიმეთვიანი უწყვეტი პროტესტის, ნამახვანში კარვების დაშლის, სოფლამდე მისასვლელი გზის გადაკეტვის და პოლიციასთან დაპირისპირების შემდეგ 16 აპრილს სამთავრობო გუნდი ჰესის მშენებლობის მოწინააღმდეგე აქტივისტებს შეხვდა. შეხვედრა მოულოდნელად, მთავრობის ადმინისტრაციის ინიციატივით დაიგეგმა, თუმცა ამას წინ უძღოდა საპატრიარქოს მოწოდება მოლაპარაკების აუცილებლობაზე.

პრემიერმინისტრ ირაკლი ღარიბაშვილის დავალებით აქტივისტებს მთავრობის ადმინისტრაციის რეგიონებთან ურთიერთობის დეპარტამენტის უფროსი, ლერი ბარნაბიშვილი, ორი გუბერნატორი და საპარლამენტო უმრავლესობის დეპუტატები შეხვდნენ.