საქართველოს პრეზიდენტი, სალომე ზურაბიშვილი კომენდანტის საათისას სვეტიცხოველში წირვას დაესწრო. კითხვების დასასმელად პრეზიდენტთან მისულ ჟურნალისტებს წინააღმდეგობა გაუწია სასულიერო პირმა, რომელიც ზურაბიშვილის დასანახად ჟურნალისტს ხელით შეეხო. კადრების მიხედვით, პრეზიდენტს რეაგირება არ ჰქონია.

ტელეკომპანია პირველისა და ფორმულას გავრცელებულ ვიდეოებში ჩანს, რომ პრეზიდენტი ღამის საათებში დაცვასა და სასულიერო პირთან ერთად გამოდის ტაძრის ეზოდან. ზუსტი დრო უცნობია, თუმცა სასულერო პირი ჟურნალისტებთან ადასტურებს, რომ წირვა გადაადგილების შეზღუდვისას გაიმართა, კომენდანტის საათი კი, მისი აზრით, არ არსებობს.

კადრებში ჩანს ისიც, რომ პრეზიდენტი უხმოდ უსმენს ჟურნალისტებს და მის ნაცვლად კითხვებს სასულიერო პასუხობს. მალევე ის ჟურნალისტს უხეშად ქაჩავს, პრეზიდენტს არიდებს და ეუბნება რომ უზრდელია. ამას ზურაბიშვილი ამჩნევს, თუმცა არ ჩერდება და დაცვასთან ერთად აგრძელებს გზას.

ფოტო: კადრები ვიდეოდან / TV პირველი და ფორმულა

ჟურნალისტების კითხვების პასუხად სასულიერო პირი ამბობს, რომ პრეზიდენტი ღამის საათებში წირვას სხვა დროსაც ესწრება. რაც შეეხება გადაადგილების შეზღუდვას, მისი თქმით, ამ საკითხს მრევლი და ის თავად აგვარებენ, თუმცა არ პასუხობს როგორ.

"საქართველოს პრეზიდენტი ჩვეულებრივი ადამიანია? არა! ის საქართველოს პრეზიდენტია. გაცილებით მეტია, რას ამბობს. ამდენმა ადამიანმა მისცა ხმა და უთხრა, შენ ხარ საქართველოს წარმომადგენელიო", — აცხადებს ის.

აღნიშნულზე განმარტებების მისაღებად On.ge პრეზიდენტის ადმინისტრაციასთან დაკავშირებას ცდილობს, თუმცა ჩვენს ზარებს არ პასუხობენ.