დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, თუ კორონავირუსის პრევენციის მიზნით დაწესებულ რეკომენდაციებს მკაცრად არ დავიცავთ, არის რისკი, რომ ვირუსის საყოველთაო გავრცელება დაიწყოს. ამის შესახებ მან პირველ არხთან სატელეფონო კომენტარში ისაუბრა.

"ყველა ეს ციფრი მიუთითებს, რომ ეპიდსიტუაცია უარესდება ქვეყანაში. გაუარესებას არ აქვს ნახტომისებური ხასიათი, თანდათან უარესდება, მაგრამ თუ ჩვენ არ დავიცავთ იმ რეკომენდაციებს მკაცრად, რაც გვაქვს დაწესებული და აღსრულება მისი არ იქნება მაქსიმალური, მაშინ, რა თქმა უნდა, დიდი რისკია იმისა, რომ დაიწყოს საყოველთაო გავრცელება ინფექციის. მოგეხსენებათ, კლასტერული გავრცელება გვაქვს",— თქვა მან.

გამყრელიძის განცხადებით, უნდა ვეცადოთ, რომ შეზღუდვები არ დაწესდეს. მისი თქმით, აპრილ-მაისში გვჭირდება, რომ კორონავირუსის ვაქცინას დღეში, სულ მცირე, 3-4 ათასი ადამიანი იკეთებდეს.