შაკო კუჭაშვილის მიერ დაფუძნებულმა მოძრაობამ წინსვლა ოპოზიციურ პარტიებს აქციები გაუმართა. აქციებს მოჰყვა სიტყვიერი და ფიზიკური დაპირისპირება.

მოძრაობამ აქცია ჯერ ევროპული საქართველოს ოფისთან მოაწყო, შემდეგ გადაინაცვლა ლეიბორისტული პარტიის ოფისთან, ბოლოს კი ერთიანი ნაციონალური მოძრაობის ოფისთან გამართეს აქცია. ენმ-ის წარმომადგენლებსა და წინსვლას წევრებს შორის ენმ-ის ოფისთან პროტესტს სიტყვიერი და ფიზიკური დაპირისპირება მოჰყვა.

მოძრაობა წინსვლას წევრებმა პარტიების ოფისთან ევროპული საბჭოს პრეზიდენტის წარმომადგენლის, კრისტიან დანიელსონის ფრაზები გააკრეს — "თქვენ რასაც აკეთებთ, ეს არის რუსულ ინტერესებში".

გირჩის ერთ-ერთმა ლიდერმა, ვახტანგ მეგრელიშვილმა 17 განაცხადა, რომ შეხვედრის დროს ევროპული საბჭოს პრეზიდენტის წარმომადგენელმა მათ უთხრა, რომ ოპოზიციის საქციელი რუსეთის ინტერესებშია.

"შეხვედრა დაიწყო იმით, რომ თქვენ რასაც აკეთებთ, ეს არის რუსეთის ინტერესებში. ანუ რომელიმე მხარე კი არა ხართ რუსეთის წარმომადგენელი, არამედ ის ბრძოლა, რომლითაც თქვენ ხართ დაკავებული, ეს თქვენი საქციელი არის. ჩვენ, ანუ ოპოზიციას მოგვმართა პირველი შეხვედრის დროს", — განაცხადა მეგრელიშვილმა.

მოძრაობა წინსვლას წევრების ნაწილი ქართულ ოცნებასთან არიან აფილირებული. ისინი აქციებს აქამდეც უმართავდნენ ოპოზიციურ პარტიებს და მხარს უჭერდნენ ან იმეორებდნენ მმართველი გუნდის რიტორიკას.