სახელმწიფო უსაფრთხოების სამსახურის (სუს) უფროსის ყოფილი მოადგილე, სოსო გოგაშვილი აცხადებს, რომ გიორგი გახარიას მიერ პრემიერმინისტრის თანამდებობიდან გადადგომა ხაზს უსვამს მმართველი პარტიის არაგუნდურობას. მისი თქმით, კრიზისიდან გამოსასვლელად საჭიროა მიმდინარე წელს დაინიშნოს ვადამდელი საპარლამენტო არჩევნები.

"გაქცეულზე მიყოლება არ მიმაჩნია სწორად, მაგრამ, ამ კრიტიკულ დროს წასვლა (გაქცევა) ისევ ხაზს უსვამს არაგუნდურობას ოცნებაში.

ზოგადად კარგია, რომ ეს გადაწყვეტილება მიიღო და წავიდა, მაგრამ ზუსტად დღეს? თუმცა, პასუხი გასაცემია საზოგადოებისთვის იმ პრობლემებზე, რაც მისმა გადაწყვეტილებებმა გამოიწვია. დარჩა კიდევ ერთი ნაბიჯი საქართველოს კრიზისიდან გამოსასვლელად — 2021-ში ვადამდელი საპარლამენტო არჩვენების დანიშვნა.

ცრუ კერპების დანგრევა გრძელდება. To be continued", — წერს გოგაშვილი საკუთარ ფეისბუქ გვერდზე.

სოსო გოგაშვილი წლების განმავლობაში ერთ-ერთ ყველაზე გავლენიან პირად მიიჩნეოდა. მან 2020 წლის ოქტომბერში მან ქართული ოცნება დატოვა, რასაც პრემიერმინისტრი გიორგი გახარია ასე გამოეხმაურა: "საერთოდ არ მაინტერესებს, რა დატოვა, ან სად წავიდა სოსო გოგაშვილი, მიზეზი საერთოდ არ მაინტერესებს და არ ვიცი, საიდან უნდა ვიცოდე?".