შრომის ინსპექციის განცხადებით, გირჩი — მეტი თავისუფლებას ლიდერის, ზურაბ ჯაფარიძის ბარის ფუნქციონირების განმეორებითობის მასალები შინაგან საქმეთა სამინისტროს გაეგზავნება.

"როგორც თქვენთვის ცნობილია, გუშინ არანებადართული ეკონომიკური საქმიანობის განხორციელებისთვის მოხდა ბარის დაჯარიმება, მოხდა ფიზიკური პირის იდენტიფიცირება და მის მიმართ იქნა გამოყენებული სანქცია 2 000 ლარის ოდენობით. შესაბამისად, შრომის ინსპექციის მიერ დაფიქსირდა განმეორებით არანებადართული საქმიანობის განხორციელება. აღნიშნულის შესახებ ინფორმაცია გადაეგზავნება შინაგან საქმეთა სამინისტროს [...] განმეორებითობის მასალები გადაეგზავნება შინაგან საქმეთა სამინისტროს, შესაბამისად, ისინი გააკეთებენ თავის კომენტარს", — განაცხადა შრომის ინსპექციის წარმომადგენელმა.

ზურაბ ჯაფარიძის თქმით, მას შრომის ინსპექციამ ჰკითხა, ეწეოდა თუ არა ეკონომიკურ საქმიანობას, რაზეც ის დაეთანხმა.

"მკითხეს ისევ ვეწევი თუ არა კომერციულ საქმიანობას აქ, ვუთხარი, რომ კი, ბარია ჩემი და მითხრეს, რომ მაშინ ეს არის მეორე შემთხვევა და შესაბამისად, მასალას გადაუგზავნიან შინაგან საქმეთა სამინისტროს. ამაზე დავიშალეთ მე და ეს ქალბატონი. მეტი არაფერი არ მომხდარა", — განაცხადა ჯაფარიძემ.

მანვე განაცხადა, რომ თუ ბარს დალუქავენ, ის ლუქს გახსნის.

"ჯერ მათ უნდა მიიყვანონ ეს ბოლომდე, უნდა გადაუგზავნონ ეს საქმე პარლამენტს, მათ უნდა შემიჩერონ უფლებამოსილება. ჯერ მათი სვლები არის დარჩენილი კიდევ, მერე გეტყვით მე რას ვაპირებ", — განაცხადა გირჩის ლიდერმა.

ზურაბ ჯაფარიძემ ჯარიმის მიუხედავად დღეს ბარი მაინც გახსნა.

გაიგე მეტი: