თბილისის მერის, კახა კალაძის ინფორმაციით, დაწყებულია მოსწალვე-ახალგაზრდობის ეროვნული სასახლის რეაბილიტაცია. მუნიციპალიტეტის მთავრობის სხდომაზე კალაძემ განაცხადა, რომ სამუშაოები 2023 წელს დასრულდება და მისი ჯამური ღირებულება, დაახლოებით, 34 მილიონი ლარია.

"ამ პროექტის ფარგლებში ჩატარდება სარესტავრაციო სამუშაოები როგორც ფასადზე, ასევე ინტერიერში. მოეწყობა ახალი სახურავი, რესტავრირდება პარაპეტი, განხორციელდება სასახლის მხატვრულ-დეკორატიული დარბაზების საკონსერვაციო-სარეაბილიტაციო სამუშაოები, კონსტრუქციული გამაგრება მოხდება ამ შენობა ნაგებობის, საინჟინრო ქსელების რეაბილიტაცია და ასევე, თვითონ ეზოს კეთილმოწყობითი სამუშაოები", — განაცხადა კახა კალაძემ.

სარესტავრაციო სამუშაოების პარალელურად, გარკვეული პერიოდის განმავლობაში სასახლის მიმდებარე ტერიტორიაზე, კონკრეტულად, რუსთაველის გამზირის მხარეს, დამონტაჟდება სამშენებლო ღობე.

ამ პროექტის განხორციელების ფარგლებში მოგვიწევს დროებითი სამშენებლო ღობის განთავსება რუსთაველის მხარეს.

"თქვენ იცით, რომ რუსთაველის მხარეს არის ორი საფეხმავლო ბილიკი, ორი ტროტუარი და ზედა ნაწილში მოგვიწევს ღობის განთავსება იმისთვის, რომ მაქსიმალურად უსაფრთხოდ ვიყოთ", — განაცხადა კახა კალაძემ.

დედაქალაქის მერის ინფორმაციით, სარესტავრაციო სამუშაოებს განვითარების ფონდი ახორციელებს. კალაძის თქმით, გამომდინარე იქიდან, რომ სასახლე კულტურული მემკვიდრეობის ძეგლია, განსაკუთრებული ყურადღება მიექცევა თითოეული ორნამენტსა თუ დეტალს.