მთავრობის რეკომენდაციით გარდაბნის მუნიციპალიტეტში სამსახურებრივი უფლებამოსილებისთვის 8 სამორიგეო მანქანა უნდა გამოეყენებინათ, თუმცა ნორმას რამდენიმე ათეულით გადააჭარბეს. ამის შესახებ მუნიციპალიტეტის 2018-2019 წლების საქმიანობის შესაბამისობის აუდიტშია საუბარი.

როგორც დოკუმენტიდან ვკითხულობთ, მუნიციპალიტეტი 2018 წელს სარგებლობდა ბალანსზე რიცხული 23 სამორიგეო და 69 კერძო საკუთრებაში არსებული მანქანით, ხოლო 2019 წელს — 19 სამორიგეო და 76 კერძო საკუთრებაში არსებული ავტომობილით.

გარდა ამისა, დოკუმენტში ვკითხულობთ, რომ ამავე წლებში მუნიციპალიტეტის მიერ გაიხარჯა 823,7 ათასი ლარის ღირებულების 393,6 ტონა საწვავი. ამასთან, გამოვლინდა 191 მსგავსი შემთხვევა, რა დროსაც ავტომობილის ავზის მოცულობაზე გადაჭარბებით ჩასხმულია 3,1 ტონა საწვავი. ამასთან, გამოვლინდა შემთხვევები როცა დროის მცირე მონაკვეთში ავზისთვის მოცულობასთან შეუსაბამოდ მეტი საწვავი ჩაისხა. აუდიტმა კიდევ რამდენიმე საეჭვო გარემოება გამოავლინა:

  • 2018-2019 წლებში მუნიციპალიტეტის მიერ 5 ტონამდე საწვავი გახარჯულია თანამშრომლების შვებულებაში ყოფნის დროს კერძო საკუთრებაში მყოფ ავტომობილებში;
  • გამოვლინდა, რომ 500 ლიტრამდე საწვავი დახარჯულია ქვეყნის ფარგლებს გარეთ მივლინებაში მყოფი პირების სარგებლობაში არსებულ მანქანებზე;
  • 6 ტონამდე საწვავი ავტომობილებში ჩასხმულია სხვადასხვა ქალაქში ისეთ დროს, როდესაც მუნიციპალიტეტში დასაქმებული პირები არ იმყოფებოდნენ ქვეყნის შიგნით სამსახურებრივ მივლინებაში.