სამხრეთ აფრიკამ ვაქცინაციის პროცესში AstraZeneca-ს ვაქცინის გამოყენება შეაჩერა, რადგან მეცნიერებმა განაცხადეს, რომ ის სამხრეთ აფრიკული შტამის წინააღმდეგ არაეფექტურია.

კვირას ონლაინ პრესკონფერენციაზე ჯანდაცვის მინისტრმა ზველი მხიზემ განაცხადა, რომ AstraZeneca-სთან ვაქცინასთან დაკავშირებით მეცნიერების რეკომენდაციებს დაელოდებიან. ამავე დროს, მან აღნიშნა, რომ ეს გავლენას არ იქონიებს ვაქცინაციის პროგრამაზე, რომელიც თებერვალში უნდა დაწყებულიყო. AstraZeneca-ს პრეპარატის ნაცვლად ისინი Pfizer-ისა და Johnson & Johnson-ის ვაქცინებს გამოიყენებენ.

სამხრეთ აფრიკას Pfizer-ის ვაქცინის 20 მილიონი დოზა, ხოლო Johnson & Johnson-ის 9 მილიონი დოზა აქვს შეკვეთილი. AstraZenecas-სთან შეთანხმებული 1,5 მილიონი ვაქცინიდან, ქვეყანაში მილიონი დოზა უკვე მიიღეს.

7 თებერვალს მეცნიერებმა დიდი ბრიტანეთიდან და სამხრეთ აფრიკიდან განაცხადეს, რომ AstraZeneca-ს ვაქცინა არაეფექტურია კორონავირუსის სამხრეთ აფრიკული შტამის მსუბუქი და ზომიერი შემთხვევებისთვის. ვაქცინის ეფექტურობა მძიმე შემთხვევებზე არ გამოკვლეულა.

AstraZeneca-ში აცხადებენ, რომ კვლევები არასაკმარისად მასშტაბური იყო, ხოლო მასში მხოლოდ ახალგაზრდები მონაწილეობდნენ, რის გამოც შედეგები შესაძლოა არასრულყოფილი იყოს. კომპანიაში დაამატეს, ვაქცინა ეფექტური უნდა იყოს მძიმე შემთხვევების დროს და სამხრეთ აფრიკული შტამისთვის მის ადაპტირებას აპირებენ.