შინაგან საქმეთა სამინისტროში ამტკიცებენ, რომ სოფელ ჟონეთში ნამახვანჰესის მშენებლობის საწინააღმდეგო აქციაზე იარაღები და ხელკეტები ამოიღეს. თუმცა შსს-ს ინფორმაციას სიცრუეს უწოდებენ აქციის მონაწილეები.

როგორც სამინისტროში აცხადებენ, მათ ორი ავტომობილი გააჩერეს: ერთ-ერთიდან ამოღებულია ვინჩესტერის მოდელის რეგისტრირებული ცეცხლსასროლი იარაღი და სნაიპერული შაშხანა, ხოლო მეორე ავტომობილიდან ბეისბოლის ჯოხი და ხელკეტი. უწყებაში აღნიშნავენ, რომ ნივთებს აქციის დასრულების შემდეგ დააბრუნებენ.

მოძრაობა რიონის ხეობის გადასარჩენად ერთ-ერთი წევრი, ვარლამ გოლეთიანი ამბობს, რომ აქცია მშვიდობიან ფორმატში მიმდინარეობს.

"ეგ მაგათ მხრიდან დაგეგმილი პროვოკაცია მგონია. იმიტომ, რომ ჩვენ თავიდანვე გაცხადებული გვქონდა ამ აქციაზე მშვიდობიანი ფორმატი, მიმდინარეობის დროსაც სულ მაგაზე ვამახვილებთ ყურადღებას. ახლა მაგათ ვის რა უნახეს საბარგულში, რა კომენტარი შეიძლება გავაკეთო", — ამბობს გოლეთიაინ On.ge-სთან.

აქციის კიდევ ერთი მონაწილე, მაკა სულაძე სამინისტროს მიერ გავრცელებულ ინფორმაციას სიცრუეს უწოდებს:

"მეტი არაფერი შერჩენიათ, რომ რაღაც გვითხრან".

დღეს, 7 თებერვალს სოფელ ჟონეთში მოქალაქეები და გარემოსდამცველები ნამახვანჰესის მშენებლობას აპროტესტებენ. მშვიდობიან აქციაზე მოქალაქეები სხვადასხვა რეგიონიდან ჩავიდნენ.

მოძრაობა რიონის ხეობის გადასარჩენად უკვე 106 დღე, რაც სოფელ ჟონეთში კარავში ათენებს და კომანია ენკას ტერიტორიიდან გასვლას მოითხოვს. დროდადრო მოძრაობის წევრები აქციებს აწყობენ. როგორც ადგილობრივები აცხადებენ, პროცესი მიმდინარეობს უკანონოდ, ხოლო აღნიშნული ჰესი დამაზიანებელი იქნება უნიკალური ბუნებისთვის.

ნამახვანი ჰესების კასკადი მდინარე რიონზე უნდა აშენდეს. მისი სიმძლავრე 433 მეგავატი იქნება. პროექტი 750 მილიონი აშშ დოლარის ღირებულებისაა და იგეგმება, რომ კასკადი ექსპლუატაციაში 2025-2026 წელს შევიდეს. პროექტს კომპანია ენკა რინიუებლზ ახორციელებს.