სოფელ ჟონეთში მოქალაქეები და გარემოსდამცველები ნამახვანჰესის მშენებლობას აპროტესტებენ. მშვიდობიან აქციაზე მოქალაქეები სხვადასხვა რეგიონიდან ჩავიდნენ.

მოძრაობა რიონის ხეობის გადასარჩენად უკვე 106 დღეა, რაც სოფელ ჟონეთში კარავში ათენებს და კომპანია ენკას ტერიტორიიდან გასვლას მოითხოვს. დროდადრო მოძრაობის წევრები აქციებს აწყობენ. როგორც ადგილობრივები აცხადებენ, პროცესი მიმდინარეობს უკანონოდ, ხოლო აღნიშნული ჰესი დამაზიანებელი იქნება უნიკალური ბუნებისთვის.

"ჩვენი ორგანიზაცია უერთდება ნამახვანი ჰესის მოწინააღმდეგეთა აქციებს, რომლებიც სრულიად სამართლიან პროტესტს გამოხატავენ. დღესაც მათი აქცია, რომელიც გულისხმობს, რომ ენკა უნდა გავიდეს და შეჩერდეს მოსამზადებელი სამუშაოები, ეს მოთხოვნებიც არის აბსოლუტურად სწორი. არამხოლოდ მოსამზადებელი სამუშაოების უკანონობაზე შეგვიძლია საუბარი, არამედ მთელი პროცესი, რომლითაც სახელმწიფომ გადასცა როგოც ნებართვა, ასევე გარემოს დაცვითი გადაწყვეტილება, იყო უკანონო", — ამბობს EMC-ს აღმასრულებელი დირექტორი, ლინა ღვინიანიძე მთავარ არხთან

ნამახვანი ჰესების კასკადი მდინარე რიონზე უნდა აშენდეს. მისი სიმძლავრე 433 მეგავატი იქნება. პროექტი 750 მილიონი აშშ დოლარის ღირებულებისაა და იგეგმება, რომ კასკადი ექსპლუატაციაში 2025-2026 წელს შევიდეს. პროექტს კომპანია ენკა რინიუებლზ ახორციელებს.

ამავე თემაზე: