8 თებერვლიდან N301 და N51 ავტობუსების მარშრუტები იცვლება.

ინტეგრირებული მარშრუტი N301 აერთიანებს N140 და N55 მარშრუტებს. შესაბამისად, აღნიშნული ნომრების მომსახურება გაჩერდება. მერიაში აცხადებენ, რომ N301-ის მოცდის ინტერვალი 11 წუთამდე შემცირდება.

N301 ავტობუსის ბოლო გაჩერება (ბერი გაბრიელ სალოსის ქუჩა) გაგრძელდება ემირ ბურჯანაძის ქუჩის (ყოფილი გარდაბნის გზატკეცილი) მიმართულებით, დავით ყიფიანის ქუჩის გადაკვეთამდე. თავისუფლების მოედნის მიმართულებით, N301 კოტე აფხაზის ქუჩის ნაცვლად, გადაადგილდება ბარათაშვილის ქუჩის გავლით. ამასთანავე, პოლიტკოვსკაიას ქუჩის მიმართულებით, მარშრუტი ვაჟა-ფშაველას გამზირის ნაცვლად, მოძრაობას განაგრძობს ქავთარაძის ქუჩის გავლით.

ასევე, ცვლილება შეეხება N51 ავტობუსსაც. 8 თებერვლიდან გლდანის რაიონში საზოგადოებრივი ტრანსპორტი იმოძრავებს ავტობუსისთვის გამოყოფილ ზოლებში, ე.წ. ბასლეინებში. შესაბამისად, მუნიციპალური ტრანსპორტი გადაადგილდება კერძო ავტომობილების ნაკადის მოძრაობის საპირისპირო მიმართულებით. სწორედ ამიტომ მერიაში განმარტავენ, რომ ავტობუსი გადაადგილდება შემდეგნაირად — მეტროსადგურ ახმეტელის თეატრიდან ან ახმეტელის თეატრის მიმართულებით, ნაცვლად შეშელიძის ქუჩისა, იმოძრავებს ქერჩისა და ვასაძის ქუჩების გავლით.