ამ წუთებში პარლამენტის მიმდებარე ტერიტორიაზე საპროტესტო აქცია მიმდინარეობს. აქციაზე შეკრებილი მოქალაქეები შეზღუდვების შემსუბუქებას და ეკონომიკის ამუშავებას ითხოვენ. ისინი სოლიდარობას უცხადებენ კორონავირუსის ეპიდემიის გამო დაწესებული შეზღუდვებით დაზარალებულ ბიზნეს-სექტორის წარმომადგენლებს.

აქციის მონაწილეების მთავარი მოთხოვნებია კომენდანტის საათის გაუქმება და ბიზნესისთვის მუშაობის უფლება, ასევე, სასწავლო და სახელოვნება სივრცეების გახსნა.

ფოტო: On.ge

აქციის ორგანიზატორების ინფორმაციით, დღის განმავლობაში გაიმართება მუსიკალური პერფორმანსები, ანიმატორთა პროგრამა ბავშვებისთვის, გიდების საფეხმავლო ტური, ნაციონალური ცეკვების პროგრამა, ეროვნული ნაწარმისა და სუვენირების გამოფენა-გაყიდვა და ა.შ.

"ჩვენი პირველი მოთხოვნა არის ის, რომ აუცილებლად უნდა გაიხსნას ქვეყანა, მკაცრი რეგულაციებით, რა თქმა უნდა. პირველ რიგში იმიტომ, რომ ჩვენ, უკვე წელიწადი სრულდება, ვართ უმუშევრად დარჩენილი და ჩვენ ოჯახებში არიან ბავშვები, რომელ ბავშვებსაც კვება სჭირდებათ ელემენტარულად, სათამაშოს და შოკოლად რომ თავი დავანებოთ", — განაცხადა აქციის ერთ-ერთმა მონაწილემ.

დღესვე, 20:00 საათზე პარლამენტთან კიდევ ერთი აქციაა დაგეგმილი.

შეგახსენებთ, რომ რამდენიმე დღის წინ რესტორნების მფლობელებმა შეზღუდვების მიუხედავად დღეს, 6 თებერვალს მუშაობის განახლება დააანონსეს. თუმცა, მას შემდეგ, რაც პრემიერმინისტრმა, გიორგი გახარიამ, 15 თებერვლიდან კვების ობიექტებისთვის ღია სივრცეებში მუშაობის აღდგენის უფლების შესახებ განაცხადა, მათ საპროტესტო გახსნა გადაიფიქრეს. თუმცა, აღსანიშნავია, რომ მათი ნაწილი ამ წუთებში, პარლამენტთან მიმდინარე აქციას უერთდება და იმ სფეროს წარმომადგენლებს უცხადებს სოლიდარობას, რომლებსაც შეზღუდვების შემსუბუქება, ჯერჯერობით არ შეეხოთ.

გაეცანით საკოორდინაციო საბჭოს ბოლო გადაწყვეტილებებს შეზღუდვებთან დაკავშირებით: