საქართველოს საგარეო საქმეთა სამინისტრო ეხმაურება ოკუპანტების მიერ გატაცებული ზაზა გახელაძისთვის, დე ფაქტო უზენაესი სასამართლოს მიერ 12 წლითა და 6 თვით პატიმრობის მისჯას და აცხადებს, საერთაშორისო საზოგადოების მობილიზებით, შეეცდება მის ქვეყანაში დაბრუნებას.

"ჩვენ კვლავ გავაგრძელებთ საერთაშორისო საზოგადოების მობილიზებას და ძალისხმევას არ დავიშურებთ, რათა საქართველოს მოქალაქე დროულად და უვნებლად დაუბრუნდეს ოჯახს", — ვკითხულობთ უწყების მიერ გავრცელებულ განცხადებაში.

სამინისტროს შეფასებით, გახელაძისთვის პატიმრობის მისჯა არის რუსეთის დესტრუქციული ქმედებების რეალური გამოხატულება იმ ფონზე, როცა მოსკოვი, დეკლარაციულად, აცხადებს მზაობას დიალოგსა და თანამშრომლობაზე.

"მსგავსი უკანონო ქმედებები, რუსეთის ფედერაციის მიერ ანექსიის კუთხით გააქტიურებული ნაბიჯების ფონზე, კიდევ უფრო ამძიმებს ადგილზე შექმნილ ისედაც რთულ ვითარებას უსაფრთხოებისა და ჰუმანიტარული თვალსაზრისით, ქმნის სიტუაციის ესკალაციის საფრთხეს და გამიზნულად უშლის ხელს სამშვიდობო მოლაპარაკებებში გაწეულ ძალისხმევას კონფლიქტის დარეგულირების მიმართულებით", — აცხადებენ საგარეო საქმეთა სამინისტროში.

უწყებაში ამბობენ, ევროპის ადამიანის უფლებათა საერთაშორისო სასამართლოს გადაწყვეტილების შემდეგ, საქართველოს გატაცებული მოქალაქისთვის პატიმრობის მისჯა განსაკუთრებით შემაშფოთებელია.

"განსაკუთრებით აღმაშფოთებელია ზაზა გახელაძის უკანონო დაკავებაში დატოვება ევროპის ადამიანის უფლებათა სასამართლოს 21 იანვრის გადაწყვეტილების ფონზე, რომელმაც ერთმნიშვნელოვნად დაადასტურა, რომ რუსეთის ფედერაცია ახორციელებს საქართველოს განუყოფელი რეგიონების ოკუპაციას და სწორედ რუსეთს, როგორც ეფექტური კონტროლის განმახორციელებელ ძალას, დააკისრა პასუხისმგებლობა ადგილზე ადამიანის უფლებების მძიმე დარღვევების გამო", — ვკითხულობთ მათ მიერ გავრცელებულ განცხადებაში.

საგარეო საქმეთა სამინისტრო მოუწოდებს რუსეთს, პატივი სცეს საქართველოს ტერიტორიულ მთლიანობასა და სუვერენიტეტს და შეასრულოს საერთაშორისო ვალდებულებები, მათ შორის 2008 წლის 12 აგვისტოს ცეცხლის შეწყვეტის შესახებ შეთანხმება. გარდა ამისა, უწყება მიმართავს საერთაშორისო საზოგადოებას, სათანადოდ შეაფასონ რუსეთის მორიგი პროვოკაცია.

ოკუპირებული ცხინვალის დე ფაქტო უზენაესმა სასამართლომ ზაზა გახელაძეს 12 წლითა და 6 თვით პატიმრობა დღეს, 5 თებერვალს მიუსაჯა. იგი გასული წლის 11 ივლის, კასპის მუნიციპალიტეტში დაჭრეს, შემდეგ კი გაიტაცეს.