20 ივნისს დაზარალებული მაკო გომური მაია ცქიტიშვილის განცხადებაზე მისთვის დახმარების პროგრამის გაგრძელების თაობაზე აცხადებს, რომ ეს არ იყო დახმარება, არამედ მოვალეობის მოხდა. ამის შესახებ მან ფორმულას ეთერში ისაუბრა.

"დღეს ცქიტიშვილის განცხადება რომ წავიკითხე, ძალიან გავბრაზდი, ეს არ არის დახმარების პროგრამა. დახმარების პროგრამა მესმის, როდესაც სახელმწიფოს კეთილი ნებაა ეს გააკეთოს, თუნდაც, რომ დაეხმაროს ადამიანებს, მაგრამ ეს არ იყო დახმარება, ეს იყო სახელმწიფოზე დაკისრებული პასუხისმგებლობის და მოვალეობის მოხდა. დახმარება არის სხვა რამე, მოვალეობა სხვა", — ამბობს გომური.

მისი თქმით, რადგან სახელმწიფომ სცნო დაზარალებულად მის მიერ და მიაყენა ტრამვა, მაგიტო უნდა აიღოს მკურნალობის პასუხისმგებლობა საკუთარ თავზე.

"მე რახან ვითხოვ სახელმწიფოსგან, რომ ჩემი მკურნალობა გააგრძელოს, ეს არა იმიტომ, რომ ფინანსურად მჭირდება მათი დახმარება ან მატერიალურად მინდა რომ უზრუნველმყონ ან ა.შ. არა, სახელმწიფო რომ მეუბნება, რომ დაზარალებული ხარ და დაგაზარალე მე, მოგაყენე ტრამვა, ვერ დაგიცავი საჭირო დროს საჭირო ადგილზე და ვერ ვიზრუნე შენს უსაფრთხოებაზე, ის უკვე ვალდებულია, რომ განაგრძოს შენი მკურნალობა", — განაცხადა მაკო გომურმა.

როგორც ვიცე-პრემიერმა, მაია ცქიტიშვილმა დღეს განაცხადა, მაკო გომურის მიმართ, რომელმაც 20 ივნისის აქციის დაშლისას თვალი დაკარგა, დახმარება გაგრძელდება. როგორ ცქიტიშვილმა თქვა, დახმარება 20 ივნისის სხვა დაზარალებულებსაც გაეწევათ.

"ბატონი ავთანდილ თალაკვაძის პირადი პასუხისმგებლობა არ იყო, ეს არის ჯანდაცვის სამინისტროს ნება და გადაწყვეტილება და, რა თქმა უნდა, ეს დახმარების პროგრამა მის მიმართებაში გაგრძელდება და ვწუხვარ, რომ ამ უხერხულობას ჰქონდა ადგილი, თუ რამე იყო მსგავსი", — განაცხადა ვიცე-პრემიერმა.

მაკო გომურმა გუშინ განაცხადა, რომ ერთი თვეა ცდილობს გერმანიაში, ექიმთან გეგმიური ვიზიტისთვის გაფრენას, თუმცა ჯანდაცვის სამინისტროსთან ამ საკითხზე კომუნიკაციას ვერ ახერხებს.

როგორც გომური საკუთარ ფეისბუქ გვერდზე წერდა, აქამდე მას კომუნიკაცია ჰქონდა ჯანდაცვის სამინისტროს, საგანგებო სიტუაციების კოორდინაციის დეპარტამენტის უფროსთან, ავთო თალაკვაძესთან. გომურის ინფორმაციით, სწორედ თალაკვაძე იყო ერთ-ერთი მათ შორის, ვინც 20 ივნისის აქციის დაშლისას დაშავებულების მკურნალობის პროცესს კურირებდა. მისი თქმით, თალაკავაძის თანამდებობდან წავსლის შემდეგ ჯანდაცვის სამინისტროდან ვერავისთან ახერხებს ეფექტიან კომუნიკაციას.