დაავადებათა კონტროლის ეროვნული ცენტრის დირექტორის მოადგილის, პაატა იმნაძის განცხადებით, მას "საცივის რეცეპტი" არასოდეს არ მოუწოდებია, ამიტომ ამ ქვეყანაში რომ ყველამ თავისი საქმე აკეთოს, კარგი იქნება. ამის შესახებ მან TV პირველის ეთერში ისაუბრა.

იმნაძემ ასე უპასუხა ჟურნალისტს, რომელმაც ჰკითხა, შესაძლებელი არის თუ არა დღის წესრიგში დაბრუნდეს შეზღუდვების დაწესება, მაშინ, როცა მის წინააღმდეგ დიდი პროტესტია.

"მე ისიც მოვისმინე, მითხრეს, კარგად არ მახსოვს, მაგრამ რაღაც თურმე მე კერძების მომზადებაში არ უნდა ჩავერიო და ისინი ეპიდემიოლოგიაში რატომ ერევიან. მართლაც ახლა, საცივის რეცეპტი მე არასოდეს მომიწოდებია, ასე გააკეთეთ-მეთქი. აქედან გამომდინარე, ყველამ თავისი საქმე, ამ ქვეყანაში ხომ ის არის მთავარი, ყველამ თავისი საქმე რომ აკეთოს, ძალიან კარგი იქნება. ჩვენ რა გვინდა ხომ? რომ გავხსნით ქვეყანას, ორ კვირაში დასაკეტი არ გახდეს ისევ", — განაცხადა მან.

რამდენიმე დღის წინ სხვადასხვა სექტორის წარმომადგენლებმა და სამოქალაქო აქტივისტებმა შეზღუდვების მოხსნის მოთხოვნით შაბათს, 6 თებერვალს პარლამენტის წინ აქცია დააანონსეს.

დღეს საქართველოს პრემიერმინისტრმა, გიორგი გახარიამ შეზღუდვების შემსუბუქება დააანონსა. კერძოდ, საქართველოში ტრანსპორტი და ბაზრობები 8 თებერვლიდან სრულად ამუშავდება, ხოლო კვების ობიექტები ღია სივრცეში 15 თებერვლიდან შეძლებენ მუშაობას. ამასთან, მთელი საქართველოს მასშტაბით სკოლებში სწავლა საკლასო ოთახებში აღდგება.

გაიგეთ მეტი: