ფოთის საპატრულოს თანამშრომელი, გელა კვაშილავა ნარკოდანაშაულზე გაკეთებული სიუჟეტის გამო TV პირველისგან ბოდიშის მოხდას მოითხოვს. ამასთან, იგი აცხადებს, რომ შეილახა მისი პატივი, ღირსება და საქმიანი რეპუტაცია, რის გამოც სასამართლოს მიმართავს და მორალური ზიანის დაკისრებას მოითხოვს.

პოლიციის მაიორი გელა კვაშილავა ფოთის საპატრულოს თანამშრომელი და ათეულის მეთაურია. ნოდარ მელაძის შაბათის საგამოძიებო სიუჟეტის თანახმად, 23 იანვარს კვაშილავას მერსედესის მარკის ავტომობილით რამდენიმე აბი სუბოქსინი გადაჰქონდა, რაც პოლიციამ ჩხრეკისას აღმოაჩინა. ტელეკომპანია წყაროზე დაყრდნობით ავრცელებდა ინფორმაციას, რომ იგი არ დააკავეს და სამსახურში დატოვეს.

4 თებერვალს შინაგან საქმეთა სამინისტროს საგანგებო ბრიფინგი გაიმართა, სადაც სტრატეგიული კომუნიკაციების დეპარტამენტის დირექტორმა, ნინო გიორგობიანმა ბოლო პერიოდში მედიაში გავრცელებულ ბრალდებებს ცრუ უწოდა. მის შეფასებით, მსგავსი ბრალდებები შსს-სა და პოლიციელების დისკრედიტაციას ისახავს მიზნად.

ბრიფინგზე მის მიმართ არსებულ კითხვებზე ისაუბრა გელა კვაშილავამაც.

"სანამ სიუჟეტი გავიდოდა ეთერში მე დამიკავშირდა ტელეკომპანიის თანამშრომელი, რომელსაც განვუმარტე, რომ ამ თემასთან არანაირი კავშირი არ მქონია, ასევე, ყველა კითხვაზე გავეცი პასუხი ჩემი კომპეტენციის ფარგლებში. მიუხედავად ამისა, მაინც გაშუქდა ჩემი ფოტოსურათი და ცრუ ინფორმაცია, თითქოს მე ნარკოტიკული საშუალებით ვარ დაკავებული", — განაცხადა შსს-ს თანამშრომელმა.

აქედან გამომდინარე, ის ბოდიშის მოხდას მოითხოვს და აპირებს, სამართლებრივად დაიცვას თავი.