ყოფილი მთავარი აუდიტორი, ლაშა თორდია მისი ცემის საქმეზე ოთარ ფარცხალაძის გამართლებას ეხმაურება და აცხადებს, რომ ყოფილი მთავარი პროკურორი ყველა ინსტიტუტზე ზემოთაა. ამის შესახებ მან მთავარ არხთან ისაუბრა.

"სასამართლომ თქვა, რომ ბანდიტი ოთარ ფარცხალაძე დგას ყველა ინსტიტუციაზე ზემოთ. ყველა ის სამსახური, რომელიც უნდა რეაგირებდეს კორუფციაზე, იცავდეს ადამიანის უფლებებს თუ რაღაცას უნდა აკეთებდეს ამ ქვეყანაში, არის მიწასთან გასწორებული და განადგურებული. თავს დამესხა დაახლოებით 10 ადამიანი, ერთ-ერთი ამოვიცანი მე, ჩოხელი, თორემ გამოძიებას არ დაუდგენია. ოთარ ფარცხალაძემ დაიწყო ეს კონფლიქტი, ოთარ ფარცხალაძემ დამიწყო საქმის გარჩევა, თუ რა კომპრომატებს ვაგროვებდი მასზე", — აცხადებს თორდუა.

მისი ადვოკატი, ეკა ქობესაშვილის თქმით კი, ეს იყო "შეთანხმებული ბრალის შეთანხმებული განაჩენი"

"ბრალდებული საერთოდ არ ცხადდებოდა სასამართლო პროცესებზე, საერთოდ არ გრძნობდა პასუხისმგებლობას როგორც ბრალდებული, რომ უნდა გამოცხადებულიყო პროცესებზე, პატივსაც არ სცემდა სასამართლოს. შეთანხმებული ბრალის შეთანხმებული განაჩენი — შემიძლია ასეთი შეფასება მივცე ამ საქმეს. მან იცოდა, რომ გამართლდებოდა და ეს იყო მხოლოდ ფორმალურად, საზოგადოების თვალში შექმილი საქმე", — აცხადებს ადვოკატი მთავარ არხთან.

დღეს ცნობილი გახდა, რომ თბილისის საქალაქო სასამართლომ ყოფილი მთავარი აუდიტორის, ლაშა თორდიას ცემაში ბრალდებული ყოფილი მთავარი პროკურორი, ოთარ ფარცხალაძე გაამართლა. როგორც On.ge-ს სასამართლოში უთხრეს, პროცესი იანვარში გაიმართა. საქმეზე ბრალდებულ კიდევ ერთ პირს, ფინანსური პოლიციის ყოფილ თანამშრომელ მიხეილ ჩოხელს სასამართლომ 5 000-ლარიანი ჯარიმა დააკისრა.

საქართველოს გენერალური პროკურატურის ინფორმაციით, ბრალდების მხარე გამამართლებელ განაჩენს გაასაჩივრებს.

2017 წლის 12 მაისს სახელმწიფო აუდიტის სამსახურის ხელმძღვანელს, ლაშა თორდიას თავს დაესხნენ. თორდია თავდასხმაში ყოფილ პროკურორ ფარცხალაძეს ადანაშაულებდა.

თორდიას მიაჩნდა, რომ თავდასხმა მისი სამსახურის მიერ ყოფილი პროკურორის შესახებ მასალების მოგროვებას უკავშირდება. გენერალური აუდიტი ამბობდა, რომ ფარცხალაძეს დაუსჯელობის განცდა აქვს.

ბრალდებების პასუხად ფარცხალაძემ განაცხადა, რომ გენერალური აუდიტი იტყუებოდა და კონფლიქტის ინიციატორი თავადვე იყო. მისი თქმით, თორდია მთვრალ მდგომარეობაში იმყოფებოდა და ხელი პირველად მან მოიქნია.

"როგორც ჩანს, მას გულში აქვს ჩარჩენილი ჩემი გარკვეული ქმედებები სამართალდამცავ უწყებებში ჩემს საქმიანობასთან დაკავშირებით, რაზეც შესაბამის ინფორმაციას მივაწვდი გამოძიებას", — ამბობდა ფარცხალაძე. თუმცა, მომხდარიდან 4 დღის განმავლობაში ის დაკითხვაზე არ დაიბარეს. უწყებაში ამბობდნენ, რომ გამოძიების პრეროგატივა იყოს ის, თუ როდის დაკითხავდენ ყოფილ პროკურორს.

2017 წლის 16 მაისს ფარცხალაძის დაკითხვისკენ პროკურატურას პარლამენტის თავმჯდომარემ მოუწოდა. 17 მაისს ყოფილი პროკურორი დაკითხეს.

ფარცხალაძის გამოკითხვიდან ერთ კვირაში, 24 მაისს სოციალურ ქსელში ლაშა თორდიას სხვა ინციდენტის ამსახველი კადრები გავრცელდა. თორდია და არასამთავრობოები აცხადებდნენ, რომ კადრების გავრცელება საეჭვოდ დაემთხვა ფარცხალაძესთან ინციდენტს და ის დამოუკიდებლად უნდა გამოეძიებინათ.

საქართველოს შინაგან საქმეთა სამინისტრომ აღნიშნული ინციდენტის გამოძიების შუალედური შედეგები გამოაქვეყნა. უწყების ინფორმაციით, ნეიტრალური მოწმეების გამოკითხვით დადგინდა, რომ ინციდენტის დროს პირველმა ხელი ლაშა თორდიამ მოიქნია და არა ფარცხალაძემ.