ნამახვან ჰესის მშენებლობის განახლების მცდელობას დღესაც პროტესტი მოყვა. ადგილზე რამდენიმე ათეული ადამიანია შეკრებილი და მშენებლობის შეჩერებას მოითხოვს.

ადგილობრივებს პოლიცია ტერიტორიის დატოვებას სთხოვს იმ არგუმენტით, რომ კერძო საკუთრებაა. აქტივისტები კი ამტკიცებენ, რომ ამ დრომდე აღნიშნული ტერიტორია კომპანიას არ ეკუთვნოდა. მათი თქმით, პოლიციამ ე.წ. შლაგბაუმი დადგა იმ გზაზე, რომელიც ჯვართან მიდიოდა, რაც არ შეიძლება, ამიტომ ჯვართან მისვლის უფლებას ითხოვენ.

ისინი აკრიტიკებენ კომპანიას და სახელმწიფოს ჰესის მშენებლობისთვის და აცხადებენ, რომ სამუშაო ადგილები არ ღირს იმ ზიანად, რასაც ჰესი გარემოს მოუტანს.

ნამახვანის ჰესების კასკადის განმახორციელებელი კომპანია ENKA აცხადებს, რომ შესაბამის უწყებებს თავად მიმართეს, რადგან მოსახლეობასთან მოლაპარაკების არაერთი მცდელობის მიუხედავად, დიალოგი არ შედგა.

"კომპანია ENKA-მ პროექტის დაწყებისთანავე არაერთხელ ჩაატარა შეხვედრები ადგილობრივი მოსახლეობის ინფორმირებისა და მათი პოზიციის გათვალისწინების მიზნით. ასევე, მუდმივად გამოხატავდა მზაობას ნეგატიურად განწყობილ ჯგუფებთან კონსტრუქციული დიალოგისთვის, რომელიც სამწუხაროდ, მათივე რადიკალური პოზიციის გამო, არ შედგა.

ეს პოზიცია კიდევ ერთხელ დაფიქსირდა გასული დღეების შეხვედრებისას, სადაც ნათლად გამოიკვეთა, რომ ყოველგვარი კითხვები და აპელირებები უცნობი ექსპერტების მოსაზრებებზე მხოლოდ და მხოლოდ პროექტის შეფერხებისა და გაჩერების საბაბს წარმოადგენს. მიუხედავად ამისა, კომპანია კვლავ რჩება ერთგული თავისი პოზიციისა და განცხადებისა, რომ მზადაა ჩაერთოს ნებისმიერ კონსტრუქციულ დიალოგში და მოისმინოს ნებისმიერი შენიშვნა წარდგენილ დოკუმენტაციასთან დაკავშირებით", — აცხადებენ კომპანიაში.

მათივე განცხადებით, ყველა საჭირო ნებართვა აქვთ, რომელიც გაცემულია შესაბამისი უწყებების მიერ, წარდგენილი კვლევების, საჯარო განხილვებისა და ყველა საჭირო დუკუმენტის ხანგრძლივი და კომპლექსური შესწავლის საფუძველზე. მათი თქმით, პროექტი ხორციელდება უსაფრთხოების უმაღლესი სტანდარტების გათვალისწინებით და სრულ შესაბამისობაშია როგორც საქართველოს, ასევე მაღალი კაშხლების საერთაშორისო კომიტეტის ნორმებსა და სტანდარტებთან.

"პროექტის განხორციელებისთვის ხელის შეშლა მიუღებელია, რადგან ეს დაკავშირებულია სოლიდურ მატერიალურ ზიანთან, რომ არაფერი ვთქვათ ქვეყნის საინვესტიციო კლიმატის მიმართ ნდობის დაკარგვის რისკზე და სამომავლო იურიდიულ გართულებებზე", — აცხადებენ კომპანიაში.

ნამახვან ჰესის და ზოგადად ჰესების მშენებლობას ადგილობრივი მოსახლეობა აპროტესტებს. ხშირად ისინი გზას კეტავენ, კარვებს შლიან და ხელს უშლიან მძიმე ტექნიკის მუშაობას.