რაგბის კავშირის პრეზიდენტად, პარლამენტში ქართული ოცნების ყოფილი დეპუტატი, ირაკლი აბუსერიძე აირჩიეს. აბუსერიძე რაგბის კავშირს მომავალი ოთხი წლის განმავლობაში უხელმძღვანელებს.

რაგბის კავშირის პრეზიდენტის არჩევა რამდენჯერმე გადაიდო. რაგბის კავშირის პრეზიდენტობის მოვალეობის შემსრულებლის, თორნიკე გოგებაშვილის განცხადებით, 30 დეკემბრის არჩევნებზე ირაკლი აბუსერიძემ 31 ხმა აიღო, ხოლო გოჩა სვანიძემ — 10 ხმა.

"მადლობა მინდა გადავუხადო ჩემს ოპონენტსაც, ჩემს მხარდამჭერებსაც, იმ ადამიანებსაც, ვინც მხარი არ დამიჭირა, ვინც არ გამოცხადდა. ალბათ, ეს მათი სურვილი იყო, მე პირველი რაც მინდა ვთქვა, გაიმარჯვა გუნდურობამ, ერთიანობამ, მორაგბეებმა და მე იმედი მაქვს, რომ ამ სულისკვეთებით გაგრძელდება თანამშრომლობა ყველასთან", — განაცხადა აბუსერიძემ.

ირაკლი აბუსერიძე 2016-2020 წლებში პარლამენტის დეპუტატი, ხოლო 2014-16 წლებში თბილისის საკრებულოს წევრი იყო. გარდა ამისა, ის 2000-13 წლებში რაგბის ეროვნულ ნაკრებში თამაშობდა.