სამგორის საოლქო საარჩევნო კომისიასთან მიმდინარე აქციის დროს ნაციონალური მოძრაობის პოლიტსაბჭოს წევრი, ბესიკ გაზდელიანი დააკავეს. როგორც პარტიის პრესსამსახურში On.ge-ს უთხრეს, იგი შენობაზე სტიკერების გაკვრის გამო დააკავეს.

შინაგან საქმეთა სამინისტროს ინფორმაციით, აღნიშნულზე გამოძიება საქართველოს ადმინისტრაციულ სამართალდარღვევათა კოდექსის 173-ე მუხლით მიმდინარეობს, რაც სამართალდამცავი ორგანოს თანამშრომლის მოთხოვნისადმი დაუმორჩილებლობას, ან ამ პირის მიმართ სხვა კანონსაწინააღმდეგო ქმედების განხორციელებას გულისხმობს.

საოლქო საარჩევნო კომისიები დღეს შემაჯამებელ ოქმს გამოსცემენ. ბოლო სხდომები 3 საათზე დაიწყო. პარალელურად კომისიებთან აქციებს ოპოზიციის წარმომადგენლები და მხარდამჭერები მართავენ.