საქართველოს პროკურატურის ცნობით, ისნის საოლქო კომისიის თავმჯდომარის გარდაცვალების საქმეზე დაკავებულებს ბრალი წარედგინათ. უწყების ცნობით, მათ ბრალი ქრთამის მიცემის, ჯგუფურად ჩადენილი იძულებისა და მუქარის, ასევე, საბრძოლო მასალის მართლსაწინააღმდეგო შეძენისა და შენახვის საქმეზე წარედგინათ.

"გამოძიებით დადგინდა, რომ 2020 წლის 6 ნოემბერს, ქ.თბილისში, ა.ხ. და ა.კ. შეხვდნენ ქ.თბილისის ისნის N5 საოლქო-საარჩევნო კომისიის თავმჯდომარე თ.გ.-ს და პოლიტიკური პარტია ერთიანი ნაციონალური მოძრაობის სახელით, ქრთამის სახით 50 000 აშშ დოლარის გადახდის სანაცვლოდ, მედიის თანდასწრებით განცხადების გაკეთება შესთავაზეს, თითქოსდა არჩევნები გაყალბდა, რის შემდეგაც მას დემონსტრაციულად უნდა დაეტოვებინა თანამდებობა. ბრალდებულები ისნის კომისიის თავმჯდომარეს უარის მიღების შემთხვევაში, ხელისუფლების შეცვლის შემდეგ დაპატიმრებით და მისი და ოჯახის წევრების ფიზიკური ანგარიშსწორებით დაემუქრნენ.

ასევე, ა.კ.-მ მართლსაწინააღმდეგოდ შეიძინა და 2020 წლის 7 ნოემბრის ჩათვლით საკუთარ საცხოვრებელ ბინაში ინახავდა საბრძოლო მასალას, რომელიც მისი საცხოვრებელი ბინის ჩხრეკის შედეგად იქნა ამოღებული", — წერია განცხადებაში.

პროკურატურის განცხადებით, ბრალდებულებისთვის აღკვეთის ღონისძიების სახით, პატიმრობის შეფარდების შუამდგომლობით თბილისის საქალაქო სასამართლოს უკვე მიმართეს. ასევე, უწყების ცნობით, გამოძიებით დგინდება, რომ ბრალდებულებმა ანალოგიური შეთავაზებით და მუქარით საოლქო საარჩევნო კომისიის სხვა წევრებსაც მიმართეს. სისხლის სამართლის საქმეზე გამოძიება გრძელდება.

მთავარი არხის კადრებში ჩანს, რომ ხუსკივაძე გამოკითხვიდან გამვლის შემდეგ დააკავეს. დაკავებამდე ამავე არხთან ინტერვიუში ამბობდა, რომ პოლიციამ მისი და მისი ოჯახის ტელეფონები და კომპიუტერი ამოიღო.

"არც არავის დავუბარებივარ, მეგობარი იყო დაბარებული პოლიციის შენობაში და იმას ჩამოვაკითხე. ჯერ მე შემათრიეს პოლიციაში და მერე მე ვინც მომაკითხა ისიც ძალით შეიყვანეს პოლიციაში. ცდილობდნენ პირადი ნივთების წართმევას.

ყველაფერი ეს დაიწყო გუშინ, მე და ვინც ვიყავით დაკითხვაზე დაბარებული, მთავარის ეთერში შვიდ საათზე როდესაც გამოვედით და იმის მერე ხდება ეს ყველაფერი და იმიტომ არის ეჭვის საფუძველი. ამას ყველაფერს დაერთო ის, რომ სანამ მე აქ ვყავდი დაკავებული, ჩემს ოჯახში შეცვივდნენ, საგამოძიებო ქმედება, ყველაფერი წაართვეს ოჯახში ტელეფონები, კომპიუტერი რაც იყო სახლში წაიღეს ყველაფერი ახსნა განმარტების გარეშე.

[მანქანას ჩხრეკდნენ] მხოლოდ და მხოლოდ ტელეფონის წართმევის მიზნით, მე განვაცხადე, რომ შიგნით მაქვს პირადი ინფორმაიცა და ტელეფონს არ მოგცემთ მეთქი და მივაწოდე მეგობარს, რომელმაც ჩადო მანქანაში. ის მეგობარიც შეათრიეს. [...] ჩემი ტელეფონიც ამოიღეს, მეგობრის ტელეფონიც ამოიღეს, სახლში ბავშვების ტელეფონიც ამოიღეს", — განაცხადა მან მთავარი არხის ეთერში დაკავებამდე.

მთავართან ინტევიუში პირი, რომელიც თავს გარდაცვლილი თედორე გობეჯიშვილისა და აკაკი ხუსკივაძის მეგობრად წარადგენს, ამბობს, რომ გობეჯიშვილი გუშინ ხუსკივაძესთან იყო სახლში, მაგრამ ეს აქამდეც არაერთხელ მომხდარა, რადგან ისინი მეგობრები იყვნენ.

მათ დაკავებას წინ უძღოდა ქართული ოცნების საგანგებო ბრიფინგი, სადაც პარტიის წარმომადგენლებმა ენმ გარდაცვლილ გობეჯიშვილზე მუქარასა და ზეწოლაში დაადანაშაულეს. გიორგი ხელაშვილმა მოუწოდა სამართალდამცავებს, დაუყოვნებლივ აღძრან სისხლის სამართლის საქმე ამ მიმართულებით.

ნაციონალური მოძრაობის ლიდერმა, ხატია დეკანოიძემ პასუხად განაცხადა, რომ ქართული ოცნება ადამიანის სიცოცხლით ვაჭრობს და პოლიტიკური მანიპულაციებისთვის იყენებს, რაც ამორალურია. ბრიფინგიდან დეკანოიძემ მმართველი გუნდის წევრებსა და იდეოლოგებს მიმართა:

"რა გჭირთ ხალხნო, ნუთუ არ გაგჩნიათ ელემენტარული მორალი, ნუთუ არ გაგაჩნიათ ელემენტარული ადმიანობა, რომ დღეს ამ სიტუაციაში კვლავ ადამიანების სიცოცხლით არ ივაჭროთ და პოლიტიკურ მანიპულაციაზე არ ილაპარაკოთ. ნუთუ არ გაგაჩნიათ ელემენტარული შინაგანი შეგრძნება იმის, თუ რა დღეშია დღეს თუნდაც ამ ადამიანის ოჯახი. რას ყვებით საერთოდ, რა დაგმართნიათ?!" — განაცხადა მან ბრიფინგზე.

დეკანოიძემ აღნიშნა ისიც, რომ მომხდარზე აუცილებლად ჩატარდება ობიექტური გამოძიება, როცა ბიძინა ივანიშვილი და მისი გუნდი წავა ხელისუფლებიდან.

გაიგეთ მეტი: