ქართული ოცნების აღმასრულებელი მდივნის, ირაკლი კობახიძის განცხადებით, მმართველ პარტიას პარლამენტში 76 მანდატი უკვე გარანტირებული აქვს. მან შედეგებთან დაკავშირებით პარტიის ოფისში სპეციალური ბრიფინგი გამართა.

როგორც იგი ამბობს, 76 მანდატის ქონა უკვე ნიშნავს იმას, რომ ქართული ოცნება ერთპარტიულად ჩამოაყალიბებს მთავრობას.

"ჩვენი დასაბუთებული მოლოდინი არის ის, რომ საბოლოო ჯამში ქართული ოცნების მანდატების რაოდენობა პარლამენტში გაიზრდება 92 მანდატამდე", — განაცხადა კობახიძემ.

წინასწარი მონაცემებით, დათვლილია უკვე ხმების 80,22 პროცენტი. ამ ეტაპისთვის ხმების 48,34 პროცენტით ქართული ოცნება ლიდერობს. ნაციონალურმა მოძრაობამ კი 26,43 პროცენტი აიღო.

დანარჩენ პარტიებს შორის ხმები ასე გადანაწილდა:

  • ევროპული საქართველო — 3,78 პროცენტი;
  • ლელო — 3,26 პროცენტი;
  • პატრიოტთა ალიანსი — 3,20 პროცენტი;
  • სტრატეგია აღმაშენებელი — 3,16 პროცენტი;
  • გირჩი — 3,06 პროცენტი;
  • მოქალაქე — 1,40 პროცენტი;
  • ლეიბორისტული პარტია — 1 პროცენტი.

ცესკოს პირველადმა შედეგებმა ოპოზიციის კრიტიკა და გაღიზიანება გამოიწვია. პოლიტიკური პარტიის ლიდერები აცხადებენ, რომ არჩევნების შედეგები რეალობას არ ასახავს. გვიან ღამით ისინი ცესკოს ოფისთან შეიკრიბნენ და გააპროტესტეს. ადგილზე მობილიზებული იყო პოლიცია.

დღეს, პირველ ნოემბერს 16:00 საათზე ოპოზიცია საპროტესტო აქციას გეგმავს, სადაც გაჟღერდება მათი გეგმებისა და მოთხოვნების შესახებ.

ცესკოს პირველადი შედეგები მიახლოებულია იმედის დაკვეთით ჩატარებული ეგზტიპოლის მონაცემებთან, რომლის მიხედვითაც, "ოცნებას" — 54%, ენმ-სა და ძალა ერთობაშიას კი 24% აქვს.

გაიგეთ მეტი ეგზიტპოლების შედეგებზე: