ქართული ოცნების ერთ-ერთი ლიდერის, ირაკლი კობახიძის თქმით, გარდაცვლილი ბარბარე რაფალიანცის საქმის ჩასაფარცხად ნაციონალურ მოძრაობას რამდენიმე თვე ჰქონდა. ასე ახსნა მან დღეს ჟურნალისტებთან საუბრისას გარდაცვლილის დედის თათია მექერაშვილის განცხადება იმის შესახებ, რომ შვილის სიკვდილის გამო წინა ხელისუფლების დადანაშაულება "ცხელ გულზე მოუვიდა".

"წინა ხელისუფლებას რამდენიმე თვე ჰქონდა, ჩაეფარცხა ეს დანაშაული. როცა კვალს ფარავ, მერე უკვე ძალიან რთულია დანაშაულის გამოძიება. შესაბამისად, მიზეზი შეიძლება ესეც იყოს და ჩვენზე ხელის შეწმენდა პარტიის წარმომადგენლებს არ გამოუვათ", — განაცხადა კობახიძემ.

მან, აგრეთვე, აღნიშნა, რომ იგივე ეხება ზურაბ ჟვანის საქმესაც, სადაც, მისივე თქმით, დანაშაულის ჩასაფარცხად ნაციონალურ მოძრაობას რამდენიმე წელი ჰქონდა.

გარდაცვლილი ბარბარე რაფალიანცის დედა, თათია მექერიშვილი ამბობს, რომ შვილის გარდაცვალების გამო ნაციონალური მოძრაობის დადანაშაულება "ცხელ გულზე" მოუვიდა. ამის შესახებ მან მთავარ არხთან ისაუბრა.

2012 წლის 30 სექტემბერს, გურჯაანის რაიონის სოფელ კოლაგში, 10 თვის ბარბარე რაფალიანცი ქვევრში გარდაცვლილი იპოვეს. მაშინ ოპოზიციაში მყოფმა ქართულმა ოცნებამ ბავშვის მკვლელობაში ნაციონალური მოძრაობა დაადანაშაულა.

არჩევნებში ქართული ოცნების გამარჯვების შემდეგ, შინაგან საქმეთა მინისტრმა ირაკლი ღარიბაშვილმა რამდენჯერმე საჯაროდ დადო პირობა, რომ საქმეს სწრაფად გამოიძიებდნენ. 2014 წელს პარლამენტმა ბარბარე რაფალიანცის საქმის გამოძიებასთან დაკავშირებით დროებითი საგამოძიებო კომისიის შექმნას მხარი არ დაუჭირა. გამოძიების შედეგი დღემდე უცნობია.