11-თვიანი პაუზის შემდეგ ერგნეთში ინციდენტების პრევენციისა და მათზე რეაგირების მექანიზმის შეხვედრა მიმდინარეობს. ბოლო შეხვედრა აქ 2019 წლის 30 აგვისტოს იყო დაგეგმილი, რომელიც ჩაიშალა, რადგან ოსური მხარე წნელისში ქართული საგუშაგოს აღებას მოითხოვდა, რაზეც უარი მიიღო.

სახელმწიფო უსაფრთხოების სამსახურის საინფორმაციო-ანალიტიკური დეპარტამენტის დირექტორის მოადგილის, ირაკლი ანთიძის განცხადებით, დღევანდელ შეხვედრაზე უკანონოდ დაპატიმრებული 3 მოქალაქის საკითხს განიხილავენ. მისივე თქმით, განსაკუთრებული ყურადღება, დაეთმობა გასული შეხვედრიდან დღემდე ოკუპირებულ რეგიონსა და მიმდებარე ტერიტორიებზე დაფიქსირებულ ყველა ინციდენტს.

"მოგეხსნებათ, რა ფონზე გვიწევს ამ შეხვედრის ჩატარება, როდესაც ჩვენი სამი თანამოქალაქე იმყოფება უკანონო პატიმრობაში. შეხვედრაზე დადგება საკითხი აღნიშნული პირების უპირობო გათავისუფლების შესახებ, რათა ისინი დროულად დაუბრუნდნენ საკუთარ ოჯახებს", — განაცხდა მან.

ფოტო: კადრები ვიდეოდან / რუსთავი 2

ფოტო: კადრები ვიდეოდან / რუსთავი 2

იმის ფონზე, როცა საოკუპაციო რეჟიმი აქტიურად ავლებდა მავთულხლართებსა და სადემარკაციო ხაზს ქართულ სოფლებში, მათ გააპროტესტეს ცენტრალური ხელისუფლების მიერ კონტროლირებად ტერიტორიაზე წნელისში საგუშაგოს გახსნა. პასუხად სუს-ში აცხადებდნენ, რომ ქართული სახელმწიფო წყვეტს, სად განალაგებს საკუთარი პოლიციის პოსტებს.