დღეს ქართული ოცნების ოფისთან, მსჯავრდებული დეკანოზის, გიორგი მამალაძის ძმამ თორნიკე მამალაძემ სათამაშო იარაღით ხელში, აქცია პერფორმანსი გამართა.

როგორც თავად აღნიშნავს ამ პერფორმანსით ბიძინა ივანიშვილს მადლობას უხდის, რომ 90 წლებში დააბრუნა.

"მინდა ამ ბოროტების ქარხანას და მის შემოქმედს, ბიძინა ივანიშვილს გადავუხადოთ მადლობა, მადლობა იმისათვის რომ დაგვაბრუნა შავ-ბნელ 90-ში წარსულში, სადაც იყო ძალადობა, მკვლელობა, იარაღის ჩადება, გაუპატიურება. დაგვაბრუნა იმ წარსულში, რომელიც გამოვიარეთ და იმ წარსულში, რომელიც რუსულთან ასოცირდებოდა. იმის მაგივრად, რომ ჩვენ განვითარებისა და ევროკაშირისკენ გვევლო, ვხედავთ რომ დღეს საქართველო რუსეთის კლანჭებში კიდევ ერთხელ მოექცა", — განაცხადა თორნიკე მამალაძემ.

გიორგი მამალაძის გათავისუფლების მოთხოვნით მის ძმას, თორნიკეს მამალაძეს სექტემბრიდან პარლამენტის წინ კარავი ჰქონდა გაშლილი.

გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.

13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად სცნო.