ალავერდელი მიტროპოლიტი მეუფე დავითი აცხადებს, რომ ისინი ითვალისწინებენ რეკომენდაციების, მაგრამ ტაძრის დაკეტვა და წირვის გარეთ ჩატარება არ შეიძლება. მისი თქმით, წესების დაცვის მომხრეები არიან და თავსაც იზღუდავენ, მაგრამ ამავდროულად ეუბნება მრევლს არ უნდა დაიჯერონ, რომ ზიარებით ან ერთად დგომით საფრთხეს ქმნიან.

"გვეუბნებიან, რომ ტაძარში არ უნდა მიხვიდეთ და ტაძრის გარეთ დადგეთ. აბა ერთი წამით წარმოიდგინეთ ახლა ჩვენ წირვა გარეთ, რომ ჩაგვეტარებინა და ტაძრები გამოკეტილი, ცარიელი ყოფილიყო. ასეთ შემთხვევა მხოლოდ ერთხელ არის, ლიტანიობისას, როცა ტაძარი ცარიელია.

არც შფოთის საბაბი გვაქვს და არც ჩხუბისა მოსურნენი ვართ. ყველაფერს ზომიერებით გავაკეთებთ", — განაცხადა მან ქადაგებისას, რომლის ვიდეოსაც რუსთავი 2 ავრცელებს.

მეუფე დავითისგან განსხვავებით, სხვა სასულიერო პირები ამბობენ, რომ როცა შესაძლებელია ეკლესიაში დისტანციის დაცვა მრევლი შიგნით დგას, მაგრამ პატარა ტაძრების შემთხვევაში, მრევლი გარეთაა და ლოცვას ხმის გამაძლიერებლებიდან ისმენს. სწორედ ეს რეკომენდაცია გასცა საპატრიარქომ.

ტაძრის ეზოში ჩაატარა დღეს საკვირაო წირვა მეუფე გრიგოლმა. მისი თქმით, ანდრია პირველწოდებულმა პირველი წირვა სწორედ ასე ჩაატარა.

პირველ აპრილს პატრიარქმა ილია მეორემ გაავრცელა მიმართა, რომლის თანახმადაც, ტაძრის კარის დახურვა შეუძლებელია და ღია იქნება მათთვის, ვინც ეკლესიაში მისვლას მოისურვებს, შესაბამისად ჩატარდება სააღდგომო ლიტურგიაც. ტაძრებში წირვა-ლოცვების ჩატარებისთვის კი სასულიერო პირებს სამი რეკომენდაცია სმს-თი გაუგზავნეს.

სამი რეკომენდაცია:

  • კომენდანტის საათის გათვალისწინებით, ხვალიდან ლოცვები დაიწყოს შუა დღის 16:00 საათზე, ხოლო ყოველ დღე ეკლესია დაიკეტოს საღამოს 8 საათისთვის;
  • აუცილებელია ტაძრის ეზოში 1,5მ-ის დაშორებით დროულად გაკეთდეს ნიშნულები;
  • ყოველდღიურად ხშირად უნდა გაიწმინდოს ხატები და სიწმინდეები (სპირტისა და ვარდის წყლით), ასევე, დამუშავდეს იატაკი და ეკლესიაში მუდმივი მეთვალყურეობისთვის გამოიყოს პასუხისმგებელი პირები.

სამთავრობო გუნდი ისევ აცხადებს, რომ საკარანტინო შეზღუდვები ეხება ყველას და სააღდგომო ლიტურგიაზე შეკრებაც საკომენდანტო საათის დარღვევა იქნება, თუმცა 3-ზე მეტი ადამიანის შეკრებისთვის ეკლესიაში არავინ დაუჯარიმებიათ.

მინისტრთა კაბინეტის წევრები უარს ამბობენ ეკლესიაში მისვლაზე და მოქალაქეებსაც სახლში დარჩენისკენ მოუწოდებენ.

ბოლო მონაცემებით, საქართველოში კორონავირუსით ინფიცირების 170 შემთხვევაა დაფიქსირებული. ჯანდაცვის სფეროს წარმომადგენლები ვირუსის გავრცელების პიკს აპრილის ბოლოს, სწორედ საეკლესიო დღესასწაულების დროს ელოდებიან.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: