უმრავლესობის წევრი, ირაკლი კობახიძე ამბობს, პარლამენტის დისტანციურ რეჟიმზე გადასვლისას, დეპუტატების "დაშინების" და "იძულების" რისკი მაღალია. ამის შესახებ მან პარლამენტის პლენარულ სხდომაზე საგანგებო მდგომარეობის დროს საკანონმდელო ორგანოს დისტანციური მუშაობის რეჟიმზე გადასვლის განხილვისას განაცხადა.

"რისკი უნდა გაანალიზდეს. რისკი უკავშირდება როგორც კიბერუსაფრთხოების საკითხებს, ასევე ნებისმიერი სხვა შემთხვევას. როდესაც ჩვენ ვართ დარბაზში, ასეთ დროს ჩვენი იძულება არის შეუძლებელი, როდესაც ჩვენ ოთახში ვართ და დისტანციურად ვმონაწილეობთ კენჭისყრაში ასეთ დროს ჩვენი იძულება, დაშინება არის ბევრად მარტივად შესაძლებელი, ამიტომ ეს რისკიც არის გასათვალისწინებელი", — განაცხადა ირაკლი კობახიძემ.

საქართველოს პარლამენტში დაჩქარებული წესით განიხილავენ რეგლამენტის პროექტს, რომლის თანახმადაც, საქართველოს პრეზიდენტის მიერ საგანგებო ან საომარი მდგომარეობის გამოცხადებისას, ობიექტური გარემოების არსებობისას, როდესაც შეუძლებელია პარლამენტის სასახლის გამართული მუშაობა, პარლამენტის თავმჯდომარის გადაწყვეტილებით, პარლამენტის საქმიანობა შეიძლება წარიმართოს დისტანციურად, სათანადო ელექტრონული საკომუნიკაციო საშუალებების გამოყენებით.