ქართული ოცნების გენერალური მდივანი და თბილისის მერი, კახა კალაძე განათლების მინისტრის მიერ ბიძინა ივანიშვილის ექვთიმე თაყაიშვილთან შედარებაზე ამბობს, რომ "ბიძინა ბიძინაა, ექვთიმე ექვთიმეაა".

"შედარებების გაკეთება არ მიყვარს. ბიძინა ბიძინაა, ექვთიმე ექვთიმეა. ორივეს, რა თქმა უნდა, ქვეყნის და ხალხის წინაშე ბევრი კარგი რამე აქვს გაკეთებული. ამიტომ, ვფიქრობ, რომ შედარებები და ამაზე ხაზგასმა არასწორი იქნებოდა", — განაცხადა კალაძემ.

ქართული ოცნების ლიდერისა და ექვთიმე თაყაიშვილის შედარებას გამოეხმაურა პრემიერ მინისტრი, გიორგი გახარიაც. როგორც მან თქვა, ივანიშვილის "ღვაწლის არდაფასება, უბრალოდ, შეუძლებელია და დღეს ბიძინა ივანიშვილი ქვეყნის წინაშე ღვაწლმოსილ ადამიანებს შორის უპირველესია.

გუშინ, 29 დეკემბერს, განათლების მინისტრმა, მიხეილ ჩხენკელმა ბიძინა ივანიშვილი თანამედროვეობის ექვთიმე თაყაიშვილს შეადარა.

"ყველა ადამიანი, რომელიც აგროვებს ჩვენი ქვეყნის, ჩვენი ისტორიის, ჩვენი კულტურის საუნჯეს და თვალის ჩინივით უფრთხილდება მას, ჩემთვის თანამედროვეობის ექვთიმე თაყაიშვილია. ასეთი ადამიანია ჩვენი დიდი ლოტბარი ანზორ ერქომაიშვილი. ასეთი ადამიანია ბიძინა ივანიშვილი, რომელიც ამ საშვილიშვილო და პატრიოტული საქმეების კეთების გარანტად დგას", — განაცხადა მინისტრმა.