საქართველოს ექს-პრეზიდენტმა, მიხეილ სააკაშვილმა გადაცემა მთავარ აქცენტებში თვალთვალზე ისაუბრა, რა დროსაც ინტერვიუს დროს ბიძინა ივანიშვილისთვის ნაჩუქარი ჯორჯ ორუელის წიგნი 1984 გაიხსენა:

"ორუელი ტყუილად ხომ არ ამოიღო? ორუელის მთავარი ფრაზა იყო "დიდი ძმა გითვალთვალებს შენ". დაგანახათ წიგნი და დაგანახათ კადრები ოჯახს როგორ უთვალთვალებენ. ერთადერთი ისაა, რომ არც ჩვენი ძმაა ბიძინა ივანიშვილი და არც დიდი. დიდი კი არა, ქონდრის კაცია", — განაცხადა სააკაშვილმა.

27 ნოემბერს ტელეკომპანია იმედზე წამყვანმა ნიკა ლალიაშვილმა ინტერვიუს დასრულების შემდეგ ბიძინა ივანიშვილს ორუელის ეს ნაწარმოები აჩუქა. მაშინ ივანიშვილმა წიგნი ნაციონალური მოძრაობის მმართველობას დაუკავშირა.

"აი, გენიოსობა ორუელის არ გამოიხატება? მწერალი როგორ საუკუნეებს უძლებს. აი, გეგონება, რომ გუშინ პირდაპირ ქართველმა მწერალმა ნაცებზე დაწერაო", — აღნიშნა ივანიშვილმა.

ჯორჯ ორუელის დისტოპიური რომანი 1984 არა საუკუნეების, არამედ 70 წლის წინ, 1949 წელს გამოქვეყნდა. ჯორჯ ორუელი წიგნში გვიყვება სამყაროზე, რომელშიც ყველაფერი პირიქითაა: ომი მშვიდობაა, მონობა – თავისუფლება, უმეცრება კი ძალაა. აქ არსებობს სიმართლის სამინისტრო, რომელიც წარსულში მომხდარ მოვლენებს ისე ასწორებს, როგორც პარტიას სურს. რომანში არ არსებობს ინდივიდის ფენომენი, რადგან ყველაფერი დამოკიდებულია პარტიაზე და "დიდ ძმაზე", რომელიც ყველას უყურებს.

27 ნოემბერს ნიკა გვარამიამ გაავრცელა ჩანაწერი, რომელშიც ასახულია, გვარამიას ცოლი და მცირეწლოვანი შვილი როგორ გადაადგილდებოდნენ მანქანით. გვარამიას თქმით, პროკურატურა მათ უთვალთვალებდა.

ეს ვიდეო პროკურატურის მიერ გვარამიას საქმეზე წარდგენილი ვიდეომტკიცებულებაა. როგორც უწყებაში On.ge-ს უთხრეს, ეს არ არის გვარამიას ოჯახზე თვალთვალის ვიდეო. მათივე მტკიცებით, ეს გამოძიების ფარგლებში მოპოვებული ერთ-ერთი მტკიცებულებაა, რომელიც ადასტურებს, რომ სადაო ავტომობილით ნიკა გვარამია და მისი ოჯახი სარგებლობდა.