ქართული ოცნების თავმჯდომარემ, ბიძინა ივანიშვილმა იმედის ეთერში ინტერვიუს დროს, ტრადიციულად, დიდი დრო დაუთმო ნაციონალურ მოძრაობაზე საუბარს. საათნახევრიან ინტერვიუში "ნაცები" და პარტიის სახელი მან 30-ზე მეტჯერ ახსენა. გარდა ამისა, მან დაახლოებით 40-ჯერ წარმოთქვა ექსპრეზიდენტის სახელი და სიტყვა "ბელადი".

დათვლისას არ გაგვითვალისწინებია შემთხვევები, როდესაც ივანიშვილი ისე საუბრობდა ნაციონალურ მოძრაობაზე, რომ პარტიას არ ახსენებდა, თუმცა ხაზს უსვამდა, რომ ეს ფრაზები მათ ეხებოდა: "ყველაფერი გააფუჭეს, თუ რამე შეიძლებოდა", "გაკოტრებული პოლიტიკოსები", "რა უფლებით ითხოვენ ესენი ჩვენგან რამის შესრულებას", "ესენი ვინ არიან", "შუბლის ძარღვი აქვთ გაწყვეტილი", "ქვეყანა მაგათ გამოა ოკუპირებული" და ა.შ.

აღსანიშნია ისიც, რომ ივანიშვილმა მაყურებელს თავიდანვე განუმარტა — როდესაც ნაციონალურ მოძრობას ახსენებდა ის ევროპულ საქართველოს, ლეიბორისტულ პარტიას, სხვა "სატელიტ პარტიებსა" და "ანასხლეტებს" გულისხმობდა.

გადაცემის დასასრულს ივანიშვილი ისევ დაუბრუნდა ოპონენტებზე საუბარს, როდესაც ჯორჯ ორუელის წიგნ 1984-ში ასახული რეალობა ნაციონალური მოძრაობის მართვის პერიოდს შეადარა და ისიც თქვა, რომ 70 წლის წინ გამოსულმა წიგნმა საუკუნეებს გაუძლო.

ეს პირველი შემთხვევა არ არის, როდესაც ივანიშვილი ინტერვიუს დროს ერთი და იმავე სიტყვას ან საკითხს ხშირად იმეორებს. მაგალითად, სამ ჟურნალისტთან ინტერვიუს დროს, ჩვენი დათვლით, მან 91-ჯერ ახსენა სიტყვა "დამელოდეთ" და 40-ზე მეტჯერ რუსთავი 2.

გაიგეთ მეტი ივანიშვილის ინტერვიუზე: