უოლტ დისნეის კომპანიამ, რომელიც ასევე მფლობელია კიდევ ისეთი ცნობილი კომპანიების, როგორებიცაა Pixar, Marvel Studios და 20th Century Fox, 12 ნოემბერს ახალი სტრიმინგ პლატფორმა Disney+ აამოქმედა, რომელიც ნეტფლიქსის მსგავსად მომხმარებლებს საშუალებას აძლევს ერთ სივრცეში თავმოყრილი მრავალი ფილმი და სერიალი იხილონ.

ახალ პლატფორმაზე მრავალფეროვან არჩევანს შორის, რაღა თქმა უნდა, მაყურებლებისთვის ასევე ხელმისაწვდომია დისნეის ყველა ცნობილი ანიმაციური ფილმი. თუმცა, კომპანია ერთი გამოწვევის წინაშე აღმოჩნდა: გასულ საუკუნეში შექმნილი რამდენიმე პოპულარული მულტფილმი ადამიანების სხვადასხვა ჯგუფის შესახებ დისკრიმინაციულ ელემენტებს შეიცავს.

მაგალითად, 1941 წლის საკულტო ანიმაციაში დამბო გვხდება ერთი პერსონაჟი ყვავი, რომელსაც ჯიმ ქროუ ჰქვია, ამ სახელით კი რასობრივი სეგრაგაციის დროს ამერიკაში შავკანიან კაცებს მოიხსენიებენ. მსგავსი დეტალების შემცველ ანიმაციურ ფილმებს Disney+-ზე წინასწარი გაფრთხილების ტექსტი ახლავს: "ეს პროგრამა წარმოდგენილია თავისი პირვანდელი სახით და შესაძლოა, შეიცავდეს მოძველებულ კულტურულ წარმოდგენებს".

მსგავსი გაფრთხილების ქვეშ მოექცა კიდევ ცნობილი მულტფილმები პიტერ პენი და ჯუნგლების წიგნი. ბევრისგან გასაოცრად, ჯერ გაფრთხილების ტექსტი წინ არ უძღვის ისეთ ანიმაციებს, როგორებიცაა ურჩხული და მზეთუნახავი, ფიფქია და შვიდი ჯუჯა, პოკაჰონტასი და მულანი, რომლებიც ასევე საკმაოდ ცნობილ კულტურულ, სოციალურ და რასობრივ სტერეოტიპებს შეიცავენ.

ფოტო: Disney

დისნეის ეს გადაწყვეტილება ბევრმა დადებითად შეაფასა, თუმცა ფიქრობენ, რომ ეს მხოლოდ პირველი წინ გადადგმული ნაბიჯია და შემდეგში უფრო მეტი კონკრეტიკაა საჭირო. მაგალითად, იგივე შემთხვევაში კომპანია Warner Bros-ი მსგავს გაფრთხილებას იყენებს: "ეს ანიმაციები, შესაძლოა, შეიცავდეს სხვადასხვა მცდარ ეთნიკურ თუ რასობრივ წარმოდგენებს, რომლებიც ერთ დროს ამერიკულ საზოგადოებაში გავრცელებული იყო. მსგავსი წარმოდგენები მაშინაც და ახლაც მცდარი და არასწორია. მათ უცვლელი სახით გიჩვენებთ, რადგან სხვაგვარად შეიძლება საკამათო გახდეს, მსგავსი სტერეოტიპები საერთოდ არსებობდა თუ არა."

ამასთან დაკავშირებით თავისი მოსაზრება დააფიქსირა ჯორჯ ვაშინგტონის უნივერსიტეტის წინამძღოლმა, გეილ ვალდიმ: "ჩვენი კულტურული მემკვიდრეობა მჭიდროდაა დაკავშირებული რასიზმის, კოლონიალიზმისა და სექსიზმის ისტორიასთან, ამიტომაც მსგავსი შემთხვევები დაგვეხმარება, რომ სათანადო კითხვების დასმა დავიწყოთ."