მსახიობი ჯეინ ფონდა ვაშინგტონში ისევ დააპატიმრეს, როცა ის კლიმატის ცვლილებების გასაპროტესტებლად აქციას მართავდა. მასთან ერთად დააკავეს ასევე მსახიობი სემ უოტერსტონი, რომელიც ფონდასთან ერთად ტელესერიალ The Grace and Frankie-ში მონაწილეობდა.

მსახიობებთან ერთად პოლიციამ 15 გამპროტესტებელი დააკავა. დაპატიმრების მიზეზი უკანონო დემონსტრაცია იყო.

მსახიობების დაპატიმრების ამსახველი კადრები ტვიტერზე გავრცელდა.

ფოტო: Frank Thorp V / Twitter

იგივე მიზეზით დააპატიმრეს ჯეინ ფონდა გასულ პარასკევსაც. 81 წლის მსახიობი იანვრიდან მოყოლებული თითქმის ყოველკვირეულად მონაწილეობს პარასკევის გაფიცვით ცნობილ საპროტესტო აქციებში, სადაც ხელისუფლებისა და დიდი კორპორაციების მიერ კლიმატის ცვლილებებთან დაკავშირებული საგანგაშო შედეგების უარყოფას აკრიტიკებენ და სასწრაფო რეაგირებას ითხოვენ.

ჯეინ ფონდას თქმით, ის გეგმავს იქამდე დააპატიმრებინოს თავი პოლიციას, სანამ მისი მოთხოვნა კლიმატური ცვლილებების შესახებ უმრავლესობის ყურადღებას არ მიიპყრობს.

"კაპიტოლიუმთან ყოველ პარასკევს მივალ, იწვიმებს თუ მზე გამოანათებს. შთაგონებული ვარ იმ საოცარი მოძრაობით, რომელიც ჩვენმა ახალგაზრდებმა ჩამოაყალიბეს", — თქვა ფონდამ გასულ კვირას, დაპატიმრების შემდეგ.

ჯეინ ფონდა ცნობილია თავისი აქტივიზმით: ის ბოლო წლების განმავლობაში აქტიურად საუბრობდა საჯაროდ კლიმატის ცვლილებით გამოწვეული მოსალოდნელი საფრთხეების შესახებ. თანაც ეს მისი დაპატიმრების პირველი შემთხვევა არ არის: პირველად იგი 1970 წელს ვიეტნამის ომის საპროტესტო აქციაზე დააკავეს.

ამ წელს პოლიციის შენობაში მსახიობისთვის გადაღებული სურათები იმდენად პოპულარულია, რომ სხვადასხვა აქსესუარებზე ბეჭდავენ. მათი გაყიდვებიდან შემოსულ თანხას ფონდა საქველმოქმედო ორგანიზაციებს ურიცხავს.