რემი 14 წლის აუტისტური სპექტრის მქონე გოგოა, რომელსაც ცოტა ხნის წინ დაბადების დღე ჰქონდა. თუმცა, საგანგებოდ მისთვის მოწყობილ წვეულებაზე არც ერთი მისი მეგობარი არ მისულა, გარდა ერთისა — სად არიან ჩემი მეგობრებიო, იკითხა გოგონამ, რამაც მამამისი მიახვედრა, რომ მოქმედების დრო იყო.

კაცმა გადაწყვიტა, რომ დაპატიჟებული 10 მეგობრის ნაცვლად, რომლებმაც საბოლოოდ უარი თქვეს მოსვლაზე, სრულიად უცნობი ადამიანები დაეპატიჟებინა.

"მოგესალმებით, ბოდიშს გიხდით შეწუხებისთვის, სხვა ვერაფერი მოვიფიქრე. საქმე ის არის, რომ დღეს ჩემი ქალიშვილის დაბადების დღეა, თუმცა, წვეულებაზე მოსვლა მისმა ვერც ერთმა მეგობარმა ვერ მოახერხა, გარდა ერთისა. ამიტომ, მინდა გთხოვოთ, რომ თუ თავისუფლი დრო გაქვთ, მოხვიდეთ. რემის აუტისტური სპექტრი აქვს და ძალიან საყვარელი, მოსიყვარულე პატარა გოგოა. აქ ყველაფერია, საჭმელი, ტორტი და სანთლები. არც მისალოცი ბარათია საჭირო და არც საჩუქრები, უბრალოდ მინდა, რომ ჩემს გოგოს დაბადების დღის გადახდაში დაეხმაროთ. მადლობა ყურადღებისთვის", — დაწერა მამამ ფეისბუქზე.

ფოტო: FACEBOOK

საჯარო ჯგუფში დაპოსტვის შემდეგ კი რამდენიმე წუთიც არ იყო გასული, როცა ტელეფონზე ზარები და წერილები არ წყდებოდა. გოგონას დაბადების დღეზე დასწრების სურვილი უამრავმა უცნობმა ადამიანმა გამოთქვა.

ფოტო: PJ ROBINS

საბოლოოდ, წვეულებას 14 უცნობი ბავშვი და მათი მშობლები შეურთდნენ და ამდენივე საჩუქარი და მისალოცი ბარათი მოიტანეს. მშობლები იმასაც აღნიშნავენ, რომ მსგავს გამოხმაურებას არ ელოდნენ და რომ აღფრთოვანებულები არიან ადამიანების სიკეთითა და ჰუმანურობით.

შედეგად რემიმ არაჩვეულებრივი საღამო გაატარა და იმ რამდენიმე საათში აქამდე უცნობ ბავშვებთან დამეგობრებაც მოასწრო.