სახელმწიფო უსაფრთხოების ყოფილი მაღალჩინოსანი სოსო გოგაშვილი ამბობს, რომ მისი სავარაუდო ლიკვიდაციის საქმეზე ისევე, როგორც პანკისის სპეცოპერაციაზე ის არ დაუკითხავთ. ამის შესახებ მან რუსთავი 2-თან საუბრისას განაცხადა.

"ჯერ არაფერზე. ჯერ აბსოლუტურად ჩვენება არ მიმეცია არაფერზე. არ ვიცი. გეგმა აქვს პროკურატურას თავისი და მიდიან ამ გეგმით. მე ვერანაირად ვერ ჩავერევი და შევაწუხებ", — განაცხადა გოგაშვილმა.

პანკისში სპეცოპერაცია, რომლის დროსაც თემირლან მაჩალიკაშვილი დაიჭრა 2017 წლის დეკემბერში ჩატარდა. იმ პერიოდიდან დღემდე მაჩალიკაშვილის ოჯახი თემირლანის სიკვდილში სოსო გოგაშვილს ადანაშაულებს.

რაც შეეხება გოგაშვილის სავარაუდო ლიკვიდაციის საქმეს, ბრიფინგი სუს-მა 7 მაისს გამართა. იმის შემდეგ გამოკითხვაზე იყვნენ მორის და მალხაზ მაჩალიკაშვილები. გოგაშვილი ამბობდა, რომ გამოძიებისთვის საჭირო ინფორმაციის მიწოდება შეუძლია.

ინფორმაციის დაზუსტება და იმის გარკვევა ჩანიშნულია თუ არა გოგაშვილის გამოკითხვა On.ge-მ სუს-ში დღეს გადაცემის ანონსის გასვლის შემდეგ სცადა, თუმცა ამ დრომდე პასუხი არ მიგვიღია.