პანკისის სპეცოპერაციის შედეგად გარდაცვლილი თემირლან მაჩალიკაშვილის მამა, მალხაზ მაჩალიკაშვილი სუს-ის უფროსის ყოფილ მოადგილეს, სოსო გოგაშვილს მოუწოდებს, რომ შეხვდეს. მან ასევე აღნიშნა ისიც, რომ სამართლიანობის აღდგენა მხოლოდ კანონიერი გზებით სურს.

"მაქვს რამდენიმე კითხვა [სოსო გოგაშვილთან], ხვალაც სანამ გამოკითხვაზე მივალ და დღესაც პარლამენტთან ვარ. თუ ჩემს წინაშე არ გრძნობ დანაშაულს, თუ ერთი პროცენტი მაინც დაგრჩა კაცობის, ღირსების, ნუ გეშინია, მოდი ჩემთან და მითხარი. მე არ ვარ დამნაშავე, არ ვარ მე საშიში კაცი! მე არ ვარ მხეცი, რომ ვიღაცას დავეტაკო და ზიანი მივაყენო, როგორი მტერიც არ უნდა იყოს", — ასე მიმართა მალხაზ მაჩალიკაშვილმა სოსო გოგაშვილს პალიტრანიუსის გადაცემაში 360 გრადუსში.

ფარული ჩანაწერი სავარაუდო ტერაქტზე

7 მაისს სახელმწიფო უსაფრთხოების სამსახურმა ბრიფინგზე განაცხადა, რომ პანკისის სპეცოპერაციის დროს მოკლული თემირლან მაჩალიკაშვილის მამას, მალხაზ მაჩალიკაშვილს ტერორისტული აქტის ორგანიზების გზით რამდენიმე პირის მკვლელობის განზრახვა ჰქონდა. უწყება ამტკიცებს, რომ მაჩალიკაშვილი ტერორისტული აქტის ჩადენას სუს-ის უფროსის ყოფილი მოადგილის, სოსო გოგაშვილის მიმართ აპირებდა.

მოდულის შენობაში დაკითხვაზე იყო მალხაზ მაჩალიკაშვილის ძმისშვილი, მორის მაჩალიკაშვილის, რომელიც სუს-ის მტკიცებით, მალხაზ მაჩალიკაშვილის გეგმის მიხედვით, ჩართული უნდა ყოფილიყო აღნიშნული ტერორისტული აქტის განხორციელებაში. უწყებამ მათი საუბრის ჩანაწერი გაასაჯაროვა.

მაჩალიკაშვილის ყველა ბრალდებას უარყოფს და ამბობს, რომ ამით მისი ოჯახის განადგურებას ცდილობენ. ის ამბობს, რომ კარავში რჩება, ბრძოლას გააგრძელებს და თუ დამნაშავეა, მზადაა დააკავონ.

"თუ მე საშიში ვარ ამ ქვეყნისთვის, თუ მე ტერორისტი ვარ რატომ არ მაკავებენ ამდენი ხანი? 2 თვის წინ სადღაც გამწარების დროს ნათქვამი და ჩაწერილი სიტყვების გამო დღეს ტერორისტს მეძახიან. რატომ არ წამასწრეს დანაშაულზე და არ დამაკავეს, თუ ტერორისტი ვარ? კი მე სულ მაქვს სურვილი გავიგო იმ ადამიანების შესახებ მეტი ვინც შვილი მომიკლეს. მაგრამ ეს დანაშაულის ჩადენაა?" — აცხადებს მალხაზ მაჩალიკაშვილი.

ამავე თემაზე: