ქართულ ოცნებაში დაბრუნებული ირაკლი ღარიბაშვილი მმართველ პარტიას ყოფილი ხელისუფლების წარმომადგენლებთან რბილ მოპყრობაში ადანაშაულებს. ღარიბაშვილი ამბობს, რომ მისი და ბიძინა ივანიშვილის პრემიერობის დროს "ამ დესტრუქციული ელემენტების რეიტინგი 6-7% იყო", ახლა კი გაზრდილია.

მისი თქმით, პრემიერობის დროს ჰქონდა ხისტი პოლიტიკა და წინა ხელისუფლების "დანაშაულებრივი რეჟიმის" წარმომადგენელი პირები დააკავა. მისივე თქმით, ეს გახდა უთანხმოების მიზეზი პარტიასთან.

"მე ვუბრუნდები ჩემს უთანხმოებას, განსხვავებულ პოზიციას, რომელიც მე მქონდა და ახლაც მაქვს. შეუძლებელია, ამ ადამიანების სწორ გზაზე დაყენება", — აცხადებს ღარიბაშვილი.

ექსპრემიერი განმარტავს, რომ ამ "ჰუმანური პოზიციის" ინიციატორი თავად ბიძინა ივანიშვილი იყო და მას სურდა საზოგადოების კონსოლიდაციო მომხდარიყო.

"მაგრამ ეს აღმოჩნდა შეუძლებელი", — დაამატა ღარიბაშვილმა. მანვე განმარტა, რომ დესტრუქციულ ძალაში ნაციონალურ მოძრაობასა და ევროპულ საქართველოს გულისხმობს.

ყოფილი პრემიერ-მინისტრი, ირაკლი ღარიბაშვილი პოლიტიკაში დღეს, 5 მარტს დაბრუნდა. მან პარტია ქართულ ოცნებაში პოლიტიკური მდივნის პოსტი დაიკავა. ის პარტიის პოლიტსაბჭოს წევრიც იქნება.

ღარიბაშვილი ამბობს, რომ ის მთაწმინდის მაჟორიტარი დეპუტატის არჩევნებისთვის არ დაბრუნებულა და პარტია 2020 წლის არჩევნებისთვის ემზადება. მისივე თქმით, ქართული ოცნება შეცდომების გამოსწორებაზე იმუშავებს.