ტელეკომპანია რუსთავი 2-ის ინფორმაციით, განათლების, მეცნიერების, კულტურისა და სპორტის მინისტრის მოადგილე, შალვა გოგოლაძე, მოჭიდავე ზურაბ დათუნაშვილის დისკვალიფიკაცია ითხოვს. როგორც ტელეკომპანია ამბობს, გოგოლაძემ ამ საკითხზე ოლიმპიური კომიტეტის დახურულ სხდომაზე სხვა ფედერაციების პრეზიდენტებთან ისაუბრა.

კურიერის მიერ გავრცელებულ აუდიოჩანაწერში, სავარაუდოდ, შალვა გოგოლაძე ამბობს, რომ საქართველოს ჩემპიონატზე დაპირისპირების შემდეგ ფედერაციის წარმომადგენლებს შეხვდა და ითხოვდა, ეთიკის კომისიას სპორტსმენის საქმე განეხილა.

"თუ გეგამ [გეგეშიძემ] იქ რამე გადაამეტა ეთიკის კომისია გეგაზეც იმსჯელებდა და "პროსტო" კიდევ ერთხელ გადადგა ფედერაციამ ნაბიჯი იმისთვის, რომ არ გასულიყო ასეთ სიღრმეებში, კიდევ ერთხელ მორიგებით და დაჯდომით ეს პრობლემა მოეგვარებინა, მაგრამ ეს თემა მე სპორტში არ მაწყობს. კიდევ ერთხელ ვიძახი, რომ გეგაზე დარტყმა კი არ იყო, სპორტზე დარტყმა იყო, ყველა თქვენგანზე დარტყმა იყო. თქვენს წარმატებაზე დარტყმა იყო და 2018 წელს კიდევ ერთხელ რომ გამოვედით ერთ ორგანიზმად, აი, მაგაზე დაგვარტყეს თავზე", — ისმის რუსთავი 2-ის მიერ გავრცელებულ აუდიოჩანაწერში.

ოლიმპიური კომიტეტის თავმჯდომარე და ქართული ოცნების დეპუტატი, ლერი ხაბელოვი ამბობს, რომ მსგავსი შინაარსის განცხადება არ მოუსმენია.

დაპირისპირება ჭიდაობის ფედერაციაში

11 იანვარს ბერძნულ-რომაულ ჭიდაობაში საქართველოს ჩემპიონატის ფინალის დროს ინციდენტი მოხდა. რუსთავი 2-ის მიერ გავრცელებულ კადრებში ჩანს, რომ მოჭიდავე ზურაბ დათუნაშვილს მუშტი სახეში საქართველოს ჭიდაობის ეროვნული ფედერაციის პრეზიდენტმა თამაზ (გეგა) გეგეშიძემ ჩაარტყა. ვიდეომასალის მიხედვით, ფედერაციის პრეზიდენტში ხელში რაღაც ნივთი უჭირავს, რომელსაც სპორტსმენის მიმართულებით იქნევს და შემდეგ მუშტს არტყამს. ამ ფაქტის შემდეგ დათუნაშვილს სახიდან სისხლი მოსდის.

ჭიდაობის ფედერაციის პრეზიდენტი თამაზ (გეგა) გეგეშიძე, სპორტის სასახლეში, სპორტსმენ ზურაბ დათუნაშვილის მიმართ განხორციელებული ძალადობის ბრალდებით 22 იანვარს, საღამოს დააკავეს. გამოძიების ვერსიით, 11 იანვარს, სპორტის სასახლეში მომხდარი დაპირისპირებისას, თამაზ (გეგა) გეგეშიძემ ფიზიკური შეურაცხყოფა მიაყენა სპორტსმენ ზურაბ დათუნაშვილს. მოჭიდავეების ნაწილი ფედერაციის პრეზიდენტის, გეგა გეგეშიძის დაკავებას აპროტესტებს. ისინი გეგეშიძის გათავისუფლებას ითხოვენ და ამბობენ, რომ სპორტის სასახლეში მომხდარი დაპირისპირება ინციდენტი იყო, რომელიც ფედერაციაშივე უნდა დასრულებულიყო.

გეგეშიძის აღკვეთის ღონისძიებაზე სასამართლომ 24 იანვარს იმსჯელა. მან ციხე 5 000 ლარის გადახდის შემდეგ დატოვა. გარდა ამისა, მან ჭიდაობის ფედერაციის პრეზიდენტის პოსტიც შეინარჩუნა.