ე.წ. ციანიდის საქმის მსჯავრდებულის, დეკანოზ გიორგი მამალაძის ძმა, თორნიკე მამალაძე მოუწოდებს პატრიარქ ილია მეორეს დეკანოზის შეწყალებისთვის პრეზიდენტს მიმართოს. ამის შესახებ სასულიერო პირის ძმამ საპატრიარქოსთან გამართულ აქციაზე განაცხადა.

"ჩემი ძმის ჯანმრთელობის მდგომარეობა რთულია. რადგან ჩემი ძმა არის სასულიერო პირი, მათი მღვდელია, აქედან გამომდინარე, მოვუწოდებთ პატრიარქს, შეასრულოს თავის თავზე დაკისრებული მდგომარეობა მწყემსი კეთილის და მიმართოს პრეზიდენტს", — განაცხადა თორნიკე მამალაძემ.

რაც შეეხება გიორგი მამალაძის ზიარებას, მისი ძმა ამბობს, რომ ისინი ორი წლის განმვალობაში ითხოვდნენ ამას, თუმცა ზიარება ინსულტის შემდეგ გახდა შესაძლებელი.

დეკანოზი გიორგი მამალაძე 16 თებერვალს ინსულტის დიაგნოზით საავადმყოფოში გადაიყვანეს. დეკანოზი გიორგი მამალაძე ამ დრომდე ღუდუშაურის კლინიკაში, ინტენსიური თერაპიის განყოფილებაში რჩება.

საავადმყოფოში გადაყვანის შემდეგ დეკანოზი ბათუმის წმინდა ნიკოლოზის სახელობის ეკლესიის წინამძღვარმა, მამა ნიკოლოზმა აზიარა. თორნიკე მამალაძე ძმის ჯანმრთელობის მდგომარეობაზე პასუხისმგებლობას საპატრიარქოს აკისრებს. დეკანოზის ზიარებისა და გათავისუფლების მოთხოვნით მან საპატრიარქოსთან კარავი გაშალა.

ციანიდის საქმე

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.

2018 წლის 13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად სცნო.