ე.წ. ციანიდის საქმეზე მსჯავრდებული დეკანოზის ძმა თორნიკე მამალაძე ძმის ჯანმრთელობის მდგომარეობაზე პასუხისმგებლობას საპატრიარქოს აკისრებს. მამალაძე უკვე ორი კვირაა დეკანოზის ზიარებისა და გათავისუფლების მოთხოვნით აქციას მართავს:

"ჩემი ძმისგან გამოგზავნილი წერილები მაქვს, სადაც დეტალურად არის აღწერილი და ილოცონ, რომ ჩემი ძმა სიკვდილს გადაურჩეს, რადგანაც, თუკი რაიმე მოუვა, მეორე დღესვე ნათელი მოეფინება ყველაფერს".

დეკანოზი გიორგი მამალაძე ამ დრომდე ღუდუშაურის კლინიკაში, ინტენსიური თერაპიის განყოფილებაში რჩება. იგი საავადმყოფოში გუშინ, 15 თებერვალს გადაიყვანეს. ექიმი თქმით, პაციენტი ინტენსიურ განყოფილებაში რჩება შემდგომი მონიტორინგისთვის.

"მისი ცნობიერება ნათელია, ადეკვატურია, კონტაქტურია, მაგრამ ასეთ მწვავედ გამოვლენილ ჩივილს ესაჭიროება ინტენსიური მეთვალყურეობა", — განმარტავს ექიმი.

შემთხვევის შემდეგ გიორგი მამალაძის ოჯახმა 17 თებერვალს, 12 საათზე საპროტესტო აქცია დააანონსა საპატრიარქოსთან. დეკანოზის ძმა თორნიკე მამალაძე საზოგადოებას მხარდაჭერისკენ მოუწოდებს. ზიარების მოთხოვნით მას დღემდე საპატრიარქოს შენობის წინ კარავი აქვს გაშლილი.

დეკანოზის ოჯახის წევრების აქცია საპატრიარქომ ეკლესიაზე ზეწოლად შეაფასა. თუმცა, პატრიარქმა გადაწყვიტა დეკანოზის ზიარების უფლება მისცეს იმ მღვდელმსახურებს, ვინც "პასუხისმგებლობას" მხოლოდ საკუთარ თავზე აიღებენ.

ციანიდის საქმე

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.

13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად სცნო.