საქართველოს ექს-პრეზიდენტის მიხეილ სააკაშვილის თქმით, მმართველი პარტიის დამფუძნებლის, ბიძინა ივანიშვილის გამოსწორება შეუძლებელია. ასე გამოეხმაურა სააკაშვილი ივანიშვილის ვიდეომიმართვას, სადაც გამოწვევებსა და შეცდომებზე იყო საუბარი.

"თქვენ, ალბათ, იხილეთ შეშინებული და დამფრთხალი ივანიშვილის სახე. ისეთი განცდა მქონდა, ქურდს რომ დაიჭერ სახლთან ნაქურდალით და გეხვეწება, ოღონდ ამ ერთხელ გამიშვი და ცხოვრებაში აღარ ვიქურდებ, გამოვსწორდები და სწორ გზას დავადგები. ხო იცით, თუ გაუშვით, აუცილებლად ბოლომდე გაგძარცვავთ, მერე შეიძლება, დანაც გაგიყაროთ", — ამბობს სააკაშვილი ივანიშვილის საპასუხოდ ჩაწერილ ვიდეომიმართვაში.

ყოფილი პრეზიდენტი მმართველი პარტიის დამფუძნებელს მიმართავს, რომ ხელისუფლების მშვიდობიანად გადასაბარებლად მოემზადოს.