იუსტიციის მინისტრმა, თეა წულუკიანმა ქართული ოცნების თავმჯდომარისა და ყოფილი პრემიერ-მინისტრის, ბიძინა ივანიშვილის ინტერვიუ საინტერესოდ მიიჩნია.

"ჩვენ ვნახეთ თუ როგორ შეიძლება ადამიანმა, რომელიც რესპონდენტიც არის და მედიატორობს დისკუსიების დროს, აიტანოს ყველა შეკითხვა, უფრო მეტიც არამხოლოდ აიტანოს, არამედ დეტალური პასუხები გასცეს და აიტანოს ისიც, მაგალითად, როდესაც მას უზრდელად ექცევიან" — განაცხადა წულუკიანმა.

23 ოქტომბერს ბიძინა ივანიშვილს ინტერვიუ სამი ტელევიზიის სამ ჟურნალისტთან, ეკა კვესიტაძესთან, დიანა ტრაპაიძესთან და ირაკლი ჩიხლაძესთან ჰქონდა. თითქმის ორსაათნახევრიანი ინტერვიუს განმავლობაში ყოფილმა პრემიერმა ბევრ საკითხზე ისაუბრა, მათ შორის, ფარულ აუდიოჩანაწერებზე, ხორავას ქუჩის საქმეზე, სალომე ზურაბიშვილის მხარდაჭერაზე და აგვისტოს ომზე, ასევე, ქვეყნის განვითარებაზე, სამედიცინო მარიხუანის ექსპორტზე და რუსთავი 2-ის მიმართ დამოკიდებულებაზე.