მას შემდეგ, რაც სოციალური საცხოვრისის მართვა თბილისის ააიპ თბილისის მუნიციპალურ თავშესაფარს დაევალა სოციალურ საცხოვრისში მცხოვრებ პირთა სამართლებრივი მდგომარეობა საგრძნობლად გაუარესდა. ამის შესახებ ადამიანის უფლებების სწავლებისა და მონიტორინგის ცენტრის (EMC) მიერ ჩატარებულ კვლევაშია ნათქვამი. EMC-ის ცნობით, საფრთხის წინაშე აღმოჩნდა სოციალური საცხოვრისის სათანადოდ ფუნქციონირების საკითხიც.

კვლევაში ვკითხულობთ, თბილისის მერიამ, საცხოვრისში მცხოვრები პირების გადამოწმების პროცესი უსახლკარო პირისათვის სტატუსის მინიჭების ახლად შემუშავებული კრიტერიუმებით დაიწყო. ახალი კრიტერიუმები, EMC-ის ცნობით, არ ითვალისწინებს სოციალურ საცხოვრისში მყოფი პირების საცხოვრისის საჭიროების მრავალწლიან გამოცდილებას.

"ბევრ მათგანს უარი ეთქვა უსახლკაროს სტატუსის მინიჭებაზე მუნიციპალიტეტში რეგისტრაციის ფაქტის არარსებობის გამო, რაც შესაძლოა მუნიციპალური საცხოვრისის სერვისის შეწყვეტის საფუძველი გახდეს", — ნათქვამია ორგანიზაციის მიერ გავრცელებულ განცხადებაში.

კვლევის მიხედვით, ახალი ხელშეკრულებებით მინიმუმამდეა დაყვანილი ბენეფიციარი ოჯახისათვის საცხოვრისით გრძელვადიანი სარგებლობის გარანტია. ამის მიზეზია თბილისის მუნიციპალიტეტის თავშესაფრის უფლება შეწყვიტოს ხელშეკრულება ცალმხრივად და დაუსაბუთებლად.

ამავე კვლევაში ვკითხულობთ, რომ საკანონმდებლო დონეზე ბენეფიციარებისათვის გაუქმებულია მათი გაძლიერებისა და რესოციალიზაციისათვის არსებული გარანტიები, რაც სოციალური საცხოვრისების ფუნქციონირების წამყვანი კომპონენტებია.

ადამიანის უფლებების სწავლებისა და მონიტორინგის ცენტრი თბილისის მერიას რეკომენდაციებით მიმართავს:

  • გაძლიერდეს და განვითარდეს შვეიცარიის განვითარების ფონდისა და ქალაქ თბილისის მერიის ერთობლივი პროექტის - სოციალური საცხოვრისი კეთილმოწყობილ გარემოში შექმნილი სერვისი და დაიბრუნოს მან სოციალური საცხოვრისის შინაარსი
  • თბილისის მუნიციპალიტეტმა პრობლემის მასშტაბის გათვალისწინებით ინტენსიურად დაიწყოს ფინანსური რესურსების მობილიზება სოციალური საცხოვრისის პროგრამის განვითარების მიზნით, რაც გულისხმობს ახალი საცხოვრისების მშენებლობას, მათ მართვას სოციალური საცხოვრისის კონცეფციის საფუძველზე.

2008-2012 წლებში, შვეიცარიის განვითარების სააგენტოსა და თბილისის მერიას შორის გაფორმებული ურთიერთგაგების მემორანდუმის ფარგლებში დაიწყო პროექტის სოციალური საცხოვრისი კეთილგანწყობილ გარემოში განხორციელება. პროექტის ერთ-ერთი მიზანი იყო გრძელვადიანი სოციალური საცხოვრისის ფუნქციონირება მუნიციპალიტეტის ტერიტორიაზე, რომელიც დროებითი საცხოვრისით უზრუნველყოფდა მუნიციპალიტეტში რეგისტრირებულ და მცხოვრებ სოციალურად დაუცველ, დევნილ და უსახლკარო მოსახლეობას, მათი გაძლიერებისა და რესოციალიზაციის ხელშეწყობისათვის.