ლუდის მწარმოებელმა სამხრეთ აფრიკულმა ბრენდმა მარიხუანას შემცველობის ლუდი გამოუშვა. კომპანიამ კანაფის უალკოჰოლო ლუდის წარმოება მას შემდეგ დაიწყო, რაც სამხრეთ აფრიკის საკონსტიტუციო სასამართლომ მარიხუანას მოხმარება პირადი მიზნებისთვის ლეგალურად სცნო.

როგორც Durban Poison-ის ოპერაციების დირექტორი, ანდრე შუბერტი ამბობს, კანაფის შემცველობის ახალი ლუდი პრემიუმ კლასის მსუბუქი ალკოჰოლური სასმელია.

"ჩვენ დიდი ხანია გვინდა ამ ლუდის გამოშვება, რადგან ყოველთვის ვიცოდით სვიისა და კანაფის ურთიერთკავშირის შესახებ", - ამბობს ანდრე შუბერტი.

კანაფის ლუდი არ შეიცავს THC-ს (ინგრედიენტს, რომელიც იწვევს ნარკოტიკულ თრობას), თუმცა მასში გამოყენებულია კანაფის ზეთი, რომელიც ლუდს გამორჩეულ და გამაგრილებელ არომატს სძენს.

ლუდის წარმოებას კომპანიისთვის სამხრეთ აფრიკის კანონი ართულებს, რომლის მიხედვითაც მარიხუანას კულტივირება აკრძალულია. სწორედ ამიტომ, Durban Poison-ს გერმანიიდან და აღმოსავლეთ ევროპიდან უწევს მარიხუანას შტამების შემოტანა.

Durban Poison ამჟამად მხოლოდ იოჰანესბურგსა და დურბანის რეგიონში იყიდება, თუმცა ის ადგილობრივი ბაზრიდან ექსპორტზე გასვლასაც გეგმავს. სამუშაოები უკვე დაწყებულია და კომპანია აშშ-ში მომდევნო 4 წლის განმავლობაში $600 მილიონიანი ბაზრის ათვისებას აპირებს.

"ლუდი ძალიან პოპულარული გახდა ადგილობრივ ბაზარზე. ის დურბანსა და იოჰანესბურგში თითქმის ყველა რესტორანშია წარმოდგენილი და გაყიდვების შთამბეჭდავი მაჩვენები აქვს", - ამბობს ანდრე შუბერტი.